Jerusalem lanuhai
6
1 Minu laia hmel thra chungchuong,I hmangai khaw la’m a fe ta le?
Kan zongpui theina ding chein,
I hmangaiin khaw tieng am a pan?
Nunghak
2 Ka hmangai a huonah a fe,
Rimtui chǐngna hmuna chun,
A ran ruol intlattir ding le
Lili par hai lawr khawm dingin.
3 Ka hmangai tă chu ka ni a,
Ka hmangai khom ka tâ a nih.
Lili par lai a ran ruol a’n tlattir.
Tlangval
4 I mawi ie, Tirza khuo iengin,
I ditum bèk bèk, Jerusalem iengin,
Puonzar khâi pheisen ruol iengin,
I mawi ropui ngei, ka lungdi!
5 I singmit la kîr rawh, ka laka hin,
Ka dol zor chieng ta êm el.
I basamin a ieng ngei maw,
Gilead tlanga kèl ruol tla khawm.
6 Beram ruol hmul vaw zo a,
An insil fai hlim lai chu,
I ha var sieu khan a ieng!
Kopkimin an inruol hmar a,
A mel hrim khom a um nawh.
7 I hmai dier phèna i bieng khan,
Theibufai phel an va ieng ngei!
8 Lalnu sawmruk, hmei sawmriet,
Lanu thienglâm tam tak ka nei a,
9 Sienkhom ka thrûvate, soiselbo hi,
A thra chuong liem bik a nih,
A chûn mal chawi, a duot hlawnu hi.
A hmutu lanuhan hamthra an ta,
Lalnuhai le hmeihaiin an inpak.
Jerusalem nunghakhai
10 Ni zung mawi ienga hung var,
Sorthlapui ienga êng no nghiel,
Turnipui ienga var phût el,
Puonzar khai pheisen ruol ienga ropui kha,
A tu tak am ni tang a ta?
Tlangval
11 Varuom vul chŭk chu thlir a,
Grep a kumum ta’m ti en a,
Theibufai par vul lai thlir dingin,
Ka ruon bilah ka zu lêng a.
12 Hriet naw kar suongtuonaah,
Ka laichinhai tawlailir-ah,
Insonin ka lo chuong daih si!
Jerusalem nunghakhai
13 Aw Sulam lanu,
Hung kir rawh, hung kir rawh,
Hung kir rawh, hung kir hram rawh,
I sakhmèl hmu nawk kan nuom.
Hla palina
Nunghak
Ieng leia Mahanaim làm ang hiel a,
Sulam lanu hi in hmu nuom am a na?