Tlangval
5
1 Ka huona chun ka hung lut ie,Aw ka rohlupui le ka koppui.
Ka beraw le rimtuihai la khawmin,
Ka khuoizu a thlâr chopin ka fâk;
Ka uoiin ka dawn, nenetui leh.
Jerusalem nunghakhai
Fa ro, aw ruolhai, dawn ro,
Dit tawkin dawn ro,
Aw lungchimhai.
Hla palina
Nunghak
2 Ka zâla chu ka la meng zing,
Chu, ka hmangaiin kot a kik chu!
Tlangval
Mi hongpek rawh, ka rohlupui,
Ka hmangai thruvate le soiselbo,
Zan daidawin ka lu a far hu a,
Ka sam khom a’n dap zo tah.
Nunghak
3 Ka silfen ka hlîp ta a,
Ka’n chei nawk ding am a ni?
Ka ke khom ka sawp ta a,
Ka sukbal nawk di’m a ni?
4 Kotkhar chu hung hong tumin,
Ka hmangai chun a hung pur a,
Ka lung a’n chawmchawrok a.
Ka juong tho, kot hong dingin.
5 Kot kalna ka hong lai chun,
Beraw’n ka kut a far a,
Ka kutpar chungah a luong,
Kotkhar kalna chunga khom.
6 Ka hongpek, ka hmangai chu,
Sienkhom a um ta si nawh!
Lam ang a hang lêt el chu,
Ka lung a va na de aw!
Ka zong ruoi a, ka tong ta nawh.
Ka ko khèk a, a mi don nawh.
7 Khawpui kan kuola invâk,
Zan vengtuhan an mi hmu a,
Mi vawin an mi’n hliem a,
Zana kul vêngtuhai chun,
Ka silpuon an mi lakpek.
8 Aw Jerusalem lanuhai,
Ka hmangai in lo hmu chun,
A zŭnah ka’n uoi a nih ti
Mi hung hrilpek hràm ro aw.
Jerusalem nunghakhai
9 Minu laia thra chungchuong,
Mi nêkin i hmangai chu,
Iem a thrat bikna a um?
Iem a thrat bikna a um,
Chuong lawma i ngên el chu?
Nunghak
10 Ka hmangai thra sen sier chu,
Sangsawm chunga lêng a nih.
11 A thlunglun rangkachak a ieng,
A bàsam inkir mawi tak chu,
Vaàk dum tle seng ang a nih.
12 A mitin thruva singmit a ieng,
Nenetuia insil hlim hlol,
Vadung kama tlä thruvate,
Singmita lunghlu thrieng bel ieng chu.
13 A bieng chu rimtui hmun,
Rimtui innam zing ang a nih.
A hnerin lili pâr vul lai a ieng a,
A thuokin beraw rimtui a ieng.
14 A chawnbànin rangkachak tluon,
Krisolit lunga phun a ieng a,
A sakruongin sai ha nawt nama
Safir lung bel mawi a ieng.
15 A pheiphung, sailungvar tluon,
Rangkachaka inthrut ang a na,
A hmêlhmang, Lebanon tlang le
A sidar thing thra tak ieng a nih.
16 A bău a thlum ngawi ngawi a,
Iengkimah ditumnaa sip a nih.
Aw Jerusalem naunuhai,
Ama chu a nih ka hmangai,
Ama chu a nih ka lungdit.