THUHRILTU
Thuhma
Thuhriltu lekhabu ( Heb.Koheleth, Gk Ekkleziastis) hi Thuthlung Hlui Baibul ei hmang laia bu sawmhni pakhatna, bung 12 le chang 220 a sei, 935 B.C vela Lal Solomon ziek a nih. Varna le hausakna tontawa thuoma um Lal Solomon chun hlimna hnotin a hun laia khawvelin a pĕk thei po po chu thaw le nei naw sam a nei nawh. A nun ngeia a tonhrieta inthokin, nisa hnuoia thil hrim hrim hi thil hlun a um nawzie, boruok amanih thuok (Heb.hebel) ang chauh a nizie le chuong ang thil hnot chu thli hnot ang chauh a nizie a hmu chieng a. Chu thu chu hi lekhabua hin a ziek a nih.
Hi lekhabua thil iengkim iengma lo el an ni thu a ziek hin nun hi a suknǐm leiin nun thâ a suktho naw pha nia ngai pawl an um a. A thren ruok chun hi lekhabua inthok hin nun umzie nasa takin an ngaituo pha a, Pathien ditzawng anga kalchawi poimawzie an hmu suok pha bok a nih. A thu khaikhawmna chu: Pathien tri la, a thupêkhai vong rawh; chu chu mihriem po po thaw ding tak chu a nih. Pathien chun ei thilthaw iengkim, arûka ei thawhai khom a hriet a, a sie a thra ang peiin, ei chungah ro a rĕl ding a ni si a (12:13-14) ti hi a nih. Hril sawng hlaw tak chu 3:1-8 hi a nih.
Thu tam tak, abikin bung 12:1-8 hi thu thup le tekhina trongkam (metaphor) hmanga a hril a ni a, a thu hmang anga a ngiel a ngana inlet chun a umzie zuk hriet fie el thei ngaina a um naw leiin, hi taka hin a thu fûn anga trongkam pangngaia inlet a nih.