Nunghak
2
1 Saron phaia raws par le,Phaizawla lili par ka nih.
Tlangval
2 Lanu ruol lai ka hmangai chu,
Hling buk laia lili pâr ieng a nih.
Nunghak
3 Ka hmangai chu val ruol lai hin,
Ngaw kara epul kŭng ieng a nih;
A hlima inthrung ka thlâkhla ie,
A ra khom a thlum bîk a nih.
4 Dawnkhawnaha a mi thruoi a,
Hmangai puonzarin a mi tuom.
5 Grêp beiin mi sukhrât la,
Epul theiin mi sukhar rawh,
I zŭna inuoi ka ni hi!
6 A kut voi tieng ka lukham a,
A kut chang tiengin a mi pom.
7 Aw Jerusalem lànuhai,
Kan inhmangaina hin dittawk,
A nga hma chun hâwl tho lo din,
Ram zuktuoi le zukpui sâlin,
Ka ngĕn takzet cheu a nih.
Hla pahnina
Nunghak
8 Ka hmangai rawl ri ka hriet,
En ta, saw a hung mĕk ie!
Tlanghai a hung zuon khŭm a,
Muolhai a tlàn khèl zung zung.
9 Zuktuoi anga hrat ka hmangai chu,
En ta, bang phĕnah a ngîr;
Tukver a’nthok a hung bi a,
Zawngdaikal awnga inthokin.
10 Ka hmangai chun a mi biek.
Tlangval
Ka hmangai, ka enchim lo,
Tho la, mi hung zui raw khai.
11 Thlasik hun a liem ta a,
Khuongruo sŭr khom a rè tah.
12 Hnuoiin pàr a hung insuo a,
Sirvahan zai hla an rem a,
Thrûva zai ri khom ei hriet tah,
Ei ram muol le tlanga hin.
13 Theichang an inbăl tran a,
Grep khom an hung par vul a,
A rim a va’n hnik ngei de!
Tho la, hung rawh, ka hmangai,
Ka enchimlo, hung raw leh.
14 Suonglung kak kara inbi,
Aw ka thrûva hung suok rawh;
I hmel mawi mi’n hmutir la,
I rawl mawi mi’n ngaitir rawh.
Jerusalem nunghakhai
15 Mi manpek ro, sihal le a tehruoihai,
Kan grep vul lai an sukram hmain.
Nunghak
16 Ka hmangai chu ka tâ a na,
Kei khom ka hmangai ta ka nih.
Lili par lai a ran ruol an tlattir a,
17 Khawfing a hung chat hma,
Zan thim a’n kieng hma chenin.
Hung kir ta rawh, aw ka hmangai,
Zuktuoi anga hrâtin hung tlàn rawh,
Bether tlanga sakhi tuoi anga hrâtin.