HLAHAI HLA
1
1 Hienghai hi hla thlang khawm, Solomon hlahai hla a nih.Hla pakhatna
Nunghak
2 Mi fawp vong vong rawh,
I hmŭr lum ngei el khan,
I hmangaina a thlum lem,
Uoiin sîngin.
3 I rim a va hang inhnik ngei,
I sakhmingin rimtui a ieng.
Nêp zo che ruol an ni nawh,
Lànu lêng ruolin.
4 Mi hung hûi la,
Tlân dŭn ei tih,
Lal chun a pindanah,
Mi thruoi raw se.
Jerusalem nunghakhai
Kan hlimna le lawmna i nih,
I hmangaina kan kŭrpui,
Uoiin sîngin.
Nunghak
An hlut che hi an thaw dik ngei!
5 Aw Jerusalem lànuhai,
Ka hănga chu ngaino ka bei;
Kedara puon in ienga hăng,
Solomon puonzar ienga nal ka nih.
6 Ka hăng leiin mi iei naw rawh,
Ni intrĕng em hăng ka ni hi.
Ka trâhai lung a sen leiin,
Grêp huon an min vĕngtir a,
Intuoi nâm hman ka ni ve nawh.
7 Mi hril rawh, aw ka lungdi,
Khaw la’m i ran ruol intlattirin,
Sŭnah khaw la’m i’n chawltir a?
Ieng leiin am hmai dier khumin,
Berampu danghai lai invâkin,
Ka zong vêl ruoi ding che a na?
Tlangval
8 Minu po po laia thra chungchuong,
I hriet naw chun, aw nang hmelthra,
Beram ruol hniekhnung hung zui la,
Berampuhai bŭkthlă sǐrah,
I kĕltehai hung intlattir rawh.
9 Faraw tawlailir keitu sakor la tuoi,
I ieng ngei maw, aw ka hmangai!
10 I bieng inno chik le i nabe an inhmè,
I ring mawitu lunghlu par sing seng leh.
11 Tangkaruo tle senga bel mawi,
Rangkachak thri siempek ka che.
Nunghak
12 Zàlkhumah ka lal a’n zam laiin,
Ka hriek rimtui a’n zăm vel a.
13 Ka trânga inbei ka hmangai hi,
Ka ta din beraw bâwmpui a nih.
14 Ka hmangai hin a ieng ngei maw,
Engedi grêp huona hena par vul lai.
Tlangval
15 Ngai ta, aw ka hmangai,
I sakhmel hi a mawi hlie hlie!
I singmitin thrûva singmit a ieng.
Nunghak
16 Ngai ta, hmangai sakhmel thra,
Ka lung i va hang dum ngei de aw!
Ei laikhum hring nghiel hi a mawi,
17 Mi zàr khumtu sidar tlungpum le
A thuotu fâr thing chen khomin.