3
1 Zan khuon ka laikhum zawlah,Ka hmangai ka zong ruoi a,
Ka zong vĕl, ka tong si nawh.
2 Tho ka ta, khawpui fangin,
Kotthlêr le tuolzawla hai,
Ka hmangai chu zong ka tih.
Ka zong vel, ka tong si nawh.
3 Khawpui kan kuola invâk,
Zàn vêngtuhai ka hmu a,
“Ka hmangai in lo hmu am?”
Tiin anni ka’n don a.
4 Anni rawi ka pêl charin,
Ka hmangai chu ka hmu tah.
Ka kuo tlat, inthla naw ning,
Mi pâitu ka chûnnu rŭnah,
Siel ang ka thruoi lut hmâ khat chu.
5 Aw Jerusalem lànuhai,
Kan inhmangaina hin dittawk,
A ngă hma chun hâwl tho lo din,
Ram zuktuoi le zukpui sâlin,
Ka ngĕn takzet cheu a nih.
Hla pathumna
Jerusalem nunghakhai
6 Thlalera inthoka hung,
Meikhu ngir ang saw tu’m a na?
Beraw le rimtui an nam rum rum,
Sumdawnghai hmuihmer rim leh.
7 En ta, Solomon tawlailir a nih.
Israel pasalthra le ralhrat ngot,
Sawmruk ruolin an zui saw!
8 An rêngin kawlhnâm an chawi,
Indo thiem mi vong an nih;
An ngûm sirah kawlhnâm an pai,
Zan triuma invĕngna dingin.
9 Lal Solomon chuongna bawm chu,
Ama ngein a siem a na,
Lebanon thinga siem a nih.
10 A ban chu tangkaruo a na,
A chung khum rangkachaka chei,
A thrungna puon senduka tuom,
A sung chu Jerusalem lanuhaiin,
Dit tawka an cheimawi a nih.
Nunghak
11 Hung suok ro ie, Zaiawn lanuhai,
Solomon ngei el hi hung en ro,
A nu’n lallukhum a’n khumtir ni,
A thâi lâk ni, a hlimna nia hin.