Tuia bei pei
11
1 Tuipuiah i bua tol suok la,Ni iemani zat hnunga chun,
A hlawk i hmu kir ding a ni si a.
2 I neihai chu sem dar rawh,
Hmun sarih, hmun rieta khom,
A ram chungah sietna ieng am,
A tlung ding ti i hriet si nawh.
3 Sûmin tui a pai rawn chun,
Hnuoi chungah ruo a sûr hlak.
Thing chu sim tieng am hmar tieng,
A khaw tieng khom tlu sien la,
A tlŭknaah a zâl hlak.
4 Thli poisatu tu khomin,
Thlai chi thlâk ngai naw ni a,
Sûm ringot thlir hlaktu chun,
Sǐk ding nei ngai bok naw nih.
5 Thli lampui i hriet naw a,
Sŭla nau insieng dan khom.
Chuong angin Iengkim siemtu,
Pathien thilthaw i hriet thei nawh.
6 Zing tieng leh thlaichi thlak la,
Zan tieng chen khom thlak pei rawh,
A ieng am a tro thra ding,
Nangin i hriet thei si nawh,
An puitling vong khom a ni thei.
7 Var hi a mawi a,
Nisa hmu khom a hlimum.
8 Ieng chen khom mihriem dam sien,
Hlim takin hmang vong raw se.
Sienkhom, inthimna hun khom,
A tam dingzie hre raw se.
Iengkim la hung dinghai khom,
Iengma lo vong a ni si a.
Thralaihai kuoma thurawn
9 Thralaihai, vang lai chènin,
In lungril khom hlim raw se.
In lungril nuom zawng zuiin,
In thaw nuom nuom chu thaw ro.
Sienkhom in thaw ang peiin,
Pathien khomin in chungthu,
Rêl a tih ti hre zing ro.
10 In lungrila lungkhamna,
In taksaa borsawmna,
A rêngin hlip thla vong ro,
In thrat lai ni a tawi si a.