I vanglaiin nangma Siemtu chu hre zing rawh-
12
1 Hun harsa, tar hunin a nang hmâ che,“Dam khom inhoi ka ti ta nawh”
I ti hun a tlung hmâ ngèi hin;
2 Nisa le var, thla le arasihai,
I hmu thrat thei naw hmâ le,
Raw sur zo, sûm inkieng hnung khom,
Innîm zinga i hriet hmâ ngei hin;
3 I’n vĕngna i kut hung inthin a,
I zâng hung inkûl vong a,
I hähai an hung tlam vong a,
Bu khom soi thei ta loa um a,
I mithai hung inthim a,
Khuo i hmu thei naw hma hin:
4 I nahai hung sêt vong a,
Kotthlêra ri hre thei ta lo a,
Bu her khawl ri hre liet liet a,
Vate inhrămin kei tho a,
An inhrăm i hriet liet liet hun,
A hung tlung hmâ ngei hin;
5 Thil insănghai hung tri a,
Kotthlêrah invâk ngam ta lo a,
Lu-ah kèlsam hung tro a,
Khau ang ela hung invăk a,
Tisa chăkna hrim nei ta lo a,
Thina kotkhara chun ngîr a,
Chatuon in i pan tawm a,
Kotthlêrah mipui inzui dŭl dŭl a,
Sûna an tră liem hma che hin;
6 Tangkaraw zai chu inchat a,
Rangkachak berbu chu koi a,
Tuikhura tuibel chu koi a,
A khai suokna hrui inchat a,
7 Pilvut chu hnuoiah kîr a,
A petu Pathien kuom tieng,
I thlarau a kìr hma hin.
8 Thuhriltu chun, “Iengma lo el,
Thil po po hi iengma lo takzet,
An lo ni vong a nih” a ta.
Thu khaikhawmna
9 Thuhriltu chu a var chauh khom ni loin, ama chun mihai chu hrietna a zirtir a, thuvar tam tak ngaituoin a zong suok a, a’n dot peiin a rem khawm a. 10 Thuhriltu chun a hril suokna ding thu fie tak a dap suok a, a thuhrilhai hi a felin a’n dik a nih. 11 Mi varhai thu chu Berampu chawi ran khalna hawlthir zum ang a na, an thuvar khon khawmhai khom thirkila nghet taka kil bur ang a nih. 12 Ka naupa, hieng thuhai hi infuinaah hmang rawh. Lekhabu siemin tawpintai a nei naw a, tiem rawn khom taksa sawlna a nih.