10
1 Tho thiin rim inhnik khom,Rimsea a siem angin,
Invêtna chikte chauin,
Varna le inzaumna,
A sukmuolpho hlak a nih.
2 Mi var lungril hrim hrim chun,
Indikna tieng a ăwn a,
Mi invêt lungril ruok chun,
Indik nawna tieng a ăwn.
3 Mi invêt khawlai leng chu,
Ningkhong a hriet naw leiin,
A’n vetzie a tăr lang hlak.
4 I chungah rorêltu lungsen chu,
Inhmŭrin tăusan el naw rawh;
To inchŭ hin lungsen khom,
A thawi dam thei hlak a nih.
5 Nisa hnuoia thil thra lo ka hmu chu,
Rorêltuhaia inthoka suok a nih:
6 Ngirhmun sângah invêt an sie,
Ngirhmun inhnuoiah mi hausa.
7 Sakor chungah siehlaw a chuong a,
Siehlaw angin hotu kein a lawn.
8 Tlâkpŭm chotu chu tlâkpŭmah tlâng a ta,
Bang nèrtu chu rûlin chuk a tih.
9 Lung sertu lungin inhliem a ta,
Thing chĕktu chu a thing chĕkin.
10 Hreipui mawl chun thâ a he a,
Chuleiin, tàt ngei ding a nih;
Chu chu annawm varna hlutzie,
Hlawtlingna intluntu a nizie chu.
11 A dawi vèt hmaa rûlin a chuk chun,
Rûl dawithiem ni a trangkai nawh.
12 Mi var bausuok a hoihawm a,
Invêt bau chun ama a dol hlak.
13 Thu invêtin a hang tran a,
Lei chawina ding a hril suok hlak.
14 Invêt chun thu uor a chîng a,
Hma tieng hre lawk ni awm takin,
Mihai kuomah thu a hril hlak.
Sienkhom tu’n am hma tieng a hriet?
15 Mi invêt sin hang thaw ve chu,
Inlawi nachang khom hre loin,
Trămsăwl khopin a pu rak hlak.
16 Lala siehlaw a thrungna ram,
Mi lienhaiin zing hmâng hmănga,
Ruoi an thrĕ dur durna hmun chu,
Ram vangduoi a va ni ngei!
17 Mi thra lala an neina ram,
Inruina ding nèka hràtna dinga,
An mi lienhaiin a hun taka,
Ruoi an thrĕna hlak ram chu,
Ram vangnei a va ni ngei!
18 Thabo tukrop chu a kûr a,
Zomthaw inchung a zung hlak.
19 Ruoi hin mi a suklawm a,
Uoiin hin nun a sukhlim;
Sienkhom hieng anga ding hin,
Sum a trûl pei hlak a nih.
20 I lungril rûk khomin lal chu,
Hril se ngai hrim hrim naw la,
I khum laizawla inthok khomin,
Milienhai trongsie inphur naw rawh;
Chungleng vahan vuongpuiin,
Lo va hril pal rawi an tih.