Mi tin chana tlu
9
1 Hi thil hi ngaituoa ka dap suok chu a nih: Mi fel le mi varhai thilthaw po po hi Pathien kuta um vong a na, sienkhom ditsaknain a lo hmuok ding le ding naw hre thei tu khom an um nawh. 2 Mi fel le mi rilo, mi thra le mi suol, inthieng le porche, chawibiekna inhlàn hlak mi le inhlàn ngai lohai khomin khuorèl thuhmun an intrawm vong a nih.
Mi thra chunga tlung chu,
Mi rilo chunga khom a tlung a,
Inkhâm chîng chunga tlung chu,
A chîng naw chunga khom a tlung.
3 Nisa hnuoia thil tlung po poin a tawpa an intrawm seng thil thra lo chu hi khuorel thuhmun hi a nih. Chu chun a tawpah a hnot khûm vong hlak. Mihriem lungril chu a suol a, a dam sung invêtnain a lungrilah hmun a khuor a, chu hnungah thi tahai chu a zui ve el a nih. 4 “Sakeibaknei thi hnung nêkin ui hring ni chu a thra lem” ti angin, a la damhai ta ding chun beisei ding a la um annawm.
5 A damhai chun an thi ding ti an hriet a,
Mithi chun ieng khom an hriet ta nawh.
Lawmman dong ding an nei ta naw a,
Tu hriet khom an hlaw ta bok nawh.
6 An hmangaina, theidăna le thîkna
Iengkim khom a bohmang dai tah.
Nisa hnuoia thilthawna ienga khom,
Thrang nawk ta ngai naw ni hai.
7 Fe la, lawm takin bu fa la, lungril hlim takin uoiin dawn rawh, Pathienin i thilthawhai chu a pom ta si a. 8 I silfenhai chu vâr zing sien la, i lu khom tlor zing raw se. 9 Pathienin nisa hnuoia a pek che i hun iengma lo sung hin i nuhmei, i hmangai le chun nun inhoi takin hmang ro. Chu chu i chanvo a na, nisa hnuoia i sin inrimnaa i chanvo chu a nih. 10 I kutin thaw ding a hmu taphot chu theitawpin thaw rawh; i fĕna ding thlăna chun sinthaw ding le remruot ding amani le hrietna le varna amanih a um si nawh.
11 Nisa hnuoia thil dang ka hmu chu:
Hi intlansieknaa hin,
Tlân hràt an hràt bik naw a,
Hi indonaa khom hin,
Râl hrât an hràt bik bok nawh.
Mi varin fàk an hmu bik naw a,
Mi chuongkai an hausa bik naw a,
Mi thiemin ditsak an hlaw bik naw a,
A hun le khuorèl angin,
Mi tin chungah a tlung el a nih.
12 Mani hringna tawp hun ding,
A hrie tu khom an um nawh:
Lĕn tri-umah ngâ an intăng a,
Chângah vate an inawk angin,
Hun thra lo hung tlung thut chun,
A tlăkbuok thut hlak a nih.
Invêtna nêka varna thratzie
13 Nisa hnuoia chun hieng ang varna hi ka hmu suok bok a, chu chun a mi tawk èm êm a. 14 Khawpui lien lo, mi tlawmte umna hi a um a. Lal hrat takin a hung bei a, a’n huol a, a vêlin dai a sak khum a. 15 Chu khuoa chun mi rethei var tak a um a, a varna hmangin khuo chu a san suok a, sienkhom chu mi rethei chu tu khomin an hriet zui zing nawh. 16 Mi rethei varna chu hmusitin, a thu chu ngaithla nuom ta naw hai sien khom, kei ruok chun, “Hratna nêkin varna a thra lem” ka ti tho tho a nih.
17 Mi var chu damte’n trong sien khom,
Lal invet ruol khĕk nêkin,
Ngai poimaw lem ding a nih.
18 Varna chu ralthuom nêkin a hlu lem a,
Mi suol pakhat ringot khomin,
Thil thra tam tak a suksiet hlak.