6
1 Nisa hnuoia thil thra lo dang, mihriemhai del riktu ka hmu chu: 2 Pathienin hausakna, sum le pai le inzaumna mi a pek a, a lungril dit zawng le chàk zawng po po chu tlaksam hrim a nei naw a, sienkhom chèn ve theina a pek si naw leia a hausakna mi dangin an chèn ta lem chu a nih. Hi hi iengma lo le mi sukrinumtu thil thra lo chu a nih.3 Miin nau zakhat neiin kum tam tak dam sien khom, a dam lai thil thra chèn lo a, a thi pha phŭm khom a hlaw si naw chun, naute a ni lai khan hlamzuiin lo liem sien, a ta dingin a thra lem. 4 Hlamzui chu a hung pieng a, thimah a lut nawk nghal a, hming khom nei hman loin thimin a tuom hmang. 5 Chu bakah, var a hmu naw a, ieng khom a hriet hman bok naw leiin, chu mi nĕk chun a hadam lem dai a nih. 6 Kum sangkhat let hni khom mi chu dam sien la, thil thra a chèn thei si naw chun thuhmun an ni el naw maw?
7 Mihriem hi a hnuk ta dinga inrim a na,
Sienkhom a châkna a rè thei chuong nawh.
8 Mi var chu mi invêt nekin,
Iem a hlawk bikna a um a?
Mihai hmaa chang dan mawi,
Mi retheiin a’n chuk khan,
Iem a na a hlawkpui chu?
9 Um lo beisei kuol vèl nêkin,
Hmu phâka lungawi a thra lem.
Hi khom hi iengma lo le,
Thli hnot ang chauh a ni vong.
10 Thil um phot hi hming nei sa vong,
Mihriem nina khom hriet sa vong a na,
A nêka hrât lem a hnè thei nawh.
11 Thu a tam leh kawk bo a tam,
Iem a na hril treu a trangkaina?
12 Hlimthla anga ral el a hringnun tawite le iengma lo hi mihriemin a hmang sungin a ta dinga thra tak chu tuin am hre thei a ta? A liem hnunga nisa hnuoia thil la hung um ding chu tuin am hril thei a ta?