Pathien inza poimawzie
5
1 Pathien ina i fe chăngin fimkhur rawh. Thil thra lo an thaw ti khom hre thei lo mi invêthaiin hlanbiek inhlàn nêkin thu ngaithla dinga Pathien in hnai chu a thra lem.2 I bau phong inrang naw la,
Pathien hmaa thu i hril dingin,
I lungril inhmaw naw raw se.
Pathien chu vana um a na,
Nang chu hnuoia um i na,
Chuleiin hril râwn naw rawh.
3 Buoi taluo chu mang sietna,
Invet chu trong rawnna a nih.
4 Pathien kuoma thu i tiem chu hlen inhmaw rawh. Mi invêt chungah Pathien a lawm ngai nawh; i thu tiem chu hlen ngei rawh. 5 Thu tiem sia hlen lo nêkin intiem naw law law a thra lem. 6 I bauin suol inthawtir naw raw se che. Tempula Pathien mi tir kuomah chun, “Ka lo intiem suol a nih” tiin thrang la ngai naw rawh. Ieng leiin am i bau suoka Pathien suklungsenin, i kut suok thilhai chu a sukbohmang ding a na? 7 A ngaituo tieng zawng inhrât ringot le a hril tieng inhrât rak hi umze bo a nih. Chuleiin, Pathien inzà rawh.
Hausakna hi iengma lo
8 Mi retheihai an nĕksawr lai le indik lo taka an chanvo an lakpĕk lai i hmu chun makti naw rawh; hotu tinin an chunga hotuhai thupek ang peia an thaw a na, hotu an insersuon treu a nih. 9 A ram tharsuok an lak seng a, lal chen khom a ram tharsuok ringa khawsa a nih.
10 Tangka sum ngâinatu chun,
Dit tawk a ngà ngai naw a,
Hausakna ngâinatu chun,
Dit tawk a hmu ngai bok nawh.
Hi khom hi iengma lo a nih.
11 Sum le pai a hung pung chun,
A fatu an pung pei hlak.
Mita en liem el naw chu,
Trangkaina iem a um a?
12 Inrim taka thoktu chun,
Fa tamin fa tlawm sien khom,
A imu a’n hnik hlak a,
Hausa chu a hausaknan,
Imu a’n hmutir ngai nawh.
13 Nisa hnuoia thil poi dang chu,
Mani sietna ding ni si,
Hausakna khawl tèn tûn dam,
14 Hausak tum talaw luot a,
A sum nei sukpung tum a,
A naupa maksanpek ding,
Nei lo khopa cha dêr hi.
15 A nu sŭla inthokin,
Saruokin a hung pieng a,
Saruokin a kir nawk a,
A sin inrim rahai chu,
Ieng khom a som thei si nawh.
16 Thil thra lo tak dang le beidongum thlak chu hi a nih:
A hung pieng dan ang bokin,
Mihriem chu a kir nawk a,
Thli ta dinga inrimtu chun,
Iem a trangkaipui hrim hrim a?
17 A dam sung hun po poin,
Thim hnuoiah bu a fak a,
Lungni lo le na tuorin,
Lungsenin hun a hmang zo.
18 Chu zoa ka hmu suok chu, Pathienin hun tawite mihriem a pek sunga a ta dinga thra le indik chu faa dawn le nisa hnuoia a sin inrimnaa a lungawi hi a nih; chu chu a chanvo a ni el. 19 Chubakah, Pathienin hausakna sum le pai a pĕk chu chèn thei ding le a chana tlu khuorel chu pom a, a sina lawm thei dinga mihriem a siem hi Pathien thilthlawnpek a nih. 20 Pathienin lungril hlimnaa a sung sip leiin a dam sung nihai chu ngaituona hman a nei mang nawh.