Varna
7
1 Hming thra hi a hlu lem,Hriek rimtui to tak nĕkin,
Thi ni khom pieng ni nĕkin.
2 Ruoithrĕna ina fe nêkin,
Lusûn ina lĕng a thra lem;
Mi tin hi la thi ding vong ei na,
Chu chu dam laia ngaituo a thra.
3 Innui nêkin lungngai a thra lem,
Lungngai hmĕlin lungril a tawk.
4 Mi var chun lusûnhai a ngaituo,
Mi invêt chun hlimhlopna ngot.
5 Mi invêt inpàk hlaw nêkin,
Mi var zilhau hlaw a hlu lem.
6 Mi invêt innui threk ri chu,
Thuka hling chok intrĕk angin,
Sawtnawteah a ré nghal hlak.
Hi khom hi iengma lo a nih,
7 Làkluinan mi var a sukvĕt a,
Thamnan lungril a sukporche.
8 Zo hi tran nêkin a thra lem a,
Dawthei khom chapo nêkin.
9 Lungsen insŭm thei a thra,
Invêt chun lungsen a pai zing.
10 “Tu lai nêkin tien lai hun kha,
Ieng leia inhoi lem am a na?”
Tiin indon ngai naw rawh,
Chu chu thil var thlàk a ni nawh.
11 Varna hi rochan anga hlû,
Dam lai ta dinga hlawkna a nih.
12 Varna hi mi humtu a na,
Sum le pai khom mi humtu a nih;
Hrietna hlawk bikna ruok chu,
A neitu nun varnan a vong him.
13 Pathien thaw dan ngaituo ro,
A sukkawi chu tu’m suktlun thei?
14 Thratnia chun hlim la,
Sietnia chun inngaituo rawh,
Pakhat chu a dang ang boka
Pathien siem ve tho a nih.
A ieng lem am a hung tlung ding,
Mihriemin a hriet thei si nawh.
15 Ka hringnun ho tak sung hin,
Hieng hi ka tong ve ve tah:
Mi indik, a felna leia bohmang,
Mi rilo, rilo taka nun hmang,
Sienkhom dam sawt vieu bok si.
16 Insukfel talaw naw la,
Insukvar talaw naw rawh;
Ieng leiin am i’n suksiet ding?
17 Rilo talawin um naw la,
Invêt biling bok naw rawh;
I thi hun hma’n i thi ding maw?
18 A taluo thil hrim hrim chu,
A ieng khom thaw a thra nawh.
Pathien trituhai ruok chun,
Thil inbûk tawk an hriet hlak.
19 Varna chun pakhat chau khom,
Khawpuia rorêltu sawm nêkin,
Thilthawthei lemin a siem thei.
20 Thil indik chauh thaw hlak mi,
Thil suol thaw ngai dĕr lo tu khom,
Hi hnuoia hin an um nawh.
21 Mi hril taphot bengkhon naw rawh,
I siehlaw trongse inphur che hre pal i tih;
22 Trongsie mi i’n phur rŭk hai,
Nangma ngeiin i hriet zing kha.
23 Hieng po po hi varna hmangin,
Ka lo fie chieng vong ta a;
“Kei khom var tang ka tih” ka ta,
Sienkhom a lo thei teu si nawh.
24 Ieng ang varna khom ni sien,
Inril le inthûk tak a ni vong a,
Tu’n am hmu suok phak an ta?
25 Chuleiin, varna le thil niphung hai,
Hre thei dinga bi a, zong suok tumin,
Ka lungril ngaituona ka pêk a;
Rîtlona hang intlawkzie le
Invêtna hang invètzie dam chu,
Hriet thiem tumin ka bei bok a.
26 Thina nêka kha lem ka hmu chu:
Tokdara thrang nuhmei a nih.
A lungril chu châng a na,
A kut chu thirkol a nih;
Pathien suklawmtun pumpel a ta,
Mi suol ruok chu âwk ngei a tih.
27 Thuhriltu chun, “En ta u,
Ka hmu suok chu hi a nih:
Thil niphung hmu suok ding chun,
Sîr tina en chieng a thra hlak.
28 Ka hmu hmâ khat ka zong a,
Pasal sangkhat lai mi ngil,
Pakhat vel chu ka hmu a,
Nuhmei lai chu ka hmu nawh.
29 Hi a nih ka hmu suok chu:
Nun ngîl taka khawsa dingin,
Pathienin mihriem a siem a,
Sienkhom thil dang dang zongin,
An kawi hmang ta seng a nih.