Nêksawrna le inrimna
4
1 Ka hei thlir vel a, nisa hnuoia inpawngnêkna hang tamzie ka hmu bok a:Nêksawrhai mitthli a far zoi zoi a,
Hnĕmtu tu khom an nei si nawh;
Nêksawrtuhan thuneina an chel leiin,
Thlamuongtu tu khom an nei nawh.
2 Hringdama la um zinghai nĕkin,
Thi tahai chu inhnar an um lem,
Kei chun ka ti a nih.
3 Anni nêk hlol chun la pieng lo,
Nisa hnuoia thil thra naw la hmu lo chu,
An chan a thra lem dai a nih.
4 Chun, sin inrimna po po le thil ei hlen suok po po hi tuolbawmhai ei inhnarna leia hung um a nih ti ka hriet tah. Hi khom hi iengma lo, thli hnot ang chauh a nih.
5 “Invêt chun a kut a sui a,
Phingtràmin a thi” ti a ni a.
6 “Hadam taka băr khat nei chu,
Inrim taka băr hni nei nêkin a thra lem”
Ti zawnga la pawl an um bok a,
A tawp chu thli hnot ang chauh a nih.
7 Chun, ka hei thlir nawk a, nisa hnuoiah iengma lo thil dang khom ka hmu a:
8 Mi pakhat, pa mal hi a um a,
Naupa le unaupa a nei naw a.
Chawl loin sin a’n rim a,
A hausak leia a lungawina,
A mitah a’n lang hrim hrim nawh.
“Mani inhoitirna chân khopin,
Tu ta dinga inrim am ka na?”
Tiin ama le ama a’n don a.
Hi khom hi iengma lo a na,
Thil rinum tak el a nih.
9 Pahni chu pakhat nêkin a thra lem,
An thaw suok tam lem leiin.
10 Pakhat a lo tlu khomin,
Pakhatin a tung ding thei.
Makhat chaua khawsa chu,
Mi vangduoi tak el a nih,
A tlu pha leh mi tu khom,
Tungdingtu a nei si nawh.
11 Pahni an zal hmunkhat chun,
An inhneng lum tuo thei a,
Makhat chun mani le mani,
Iengtin am inhneng lum a ta?
12 A mal ringota um chu,
Hnebàn a olsam hlak a,
Pahni chu an insan thei.
Hrui khom thlop thum a ni chun,
Kei tan el thei a ni nawh.
13 Lal tar le invêt, mi thurawn la ta lo nêk chun tleirawl rethei, sienkhom var si ni a thra lem. 14 Chuong ang tleirawl chu lung ina inthoka hung suok khom ni sien, an naw leh rethei mongtola pieng khom ni sien, lal a la hung ni thei a nih. 15 Nisa hnuoia lêng mi tinin chuong ang tleirawl chu lala siem dingin thrangpui an nuom ti ka hriet tah. 16 Sienkhom, lal chu ieng anga inlârin mi tiem seng loin zuihai sien khom, suon tharhaiin an la hung hnawl nawk tho hlak. Hi khom hi iengma lo le thli hnot ang chauh a nih.