Iengkim mani hunah
3
1 Iengkim ta dingin hunbi ruot a um a,Van hnuoia thil iengkim hin hunbi a nei seng:
2 Pieng hun a um a, thi hun a um;
Phun hun a um a, phawi hun a um;
3 Sukhlum hun a um a, sukdam hun a um;
Thriek hun a um a, bawl hun a um;
4 Trap hun a um a, innui hun a um;
Sŭn hun a um a, lăm hun a um;
5 Lung pei hun a um a, lak khawm hun a um;
Inkuo hun a um a, inhnăm hun a um;
6 Zong hun a um a, sukhmang hun a um;
Kol hun a um a, dehâwn hun a um;
7 Sukthlêr hun a um a, phăwk hun a um;
To hun a um a, trong hun a um;
8 Hmangai hun a um a, theida hun a um;
Indo hun a um a, muong hun a um.
9 Sinthawtuin a sin inrimnaa inthokin hlawkna ieng am a hmu a? 10 Pathienin mihriem nauhai chunga phur a lo innghat chu ka hmu tah. 11 Iengkim a hun taka mawiin a siem a. Mihriem lungrilah chatuon a sie bok a. Sienkhom, chuong sa khom chun a tîra inthoka a tawp chena Pathien thilthaw chu an hmu suok thei chuong nawh. 12 Hlim taka um a, an dam sunga thil thra mihriemin an thaw nêka thra lem ieng khom ka hriet nawh. 13 Mi tinin fa le dawn a, an sin inrimna po poa lungawina an hmu hi Pathien thilthlawnpek a nih. 14 Pathienin a thaw taphot hi kumkhuo dai ding a nih ti ka hriet a, ieng khom bel sa thei a ni naw a, ieng khom lăk thrè thei a ni bok nawh. Mihriemin ama an tri theina dinga Pathienin a thaw a ni si a.
15 A um lai hi a um ta sâ a na,
A la hung um pei ding khom,
A um ta sâ vong a nih;
Pathien chun a bo tahai kha,
A hung lak kir nawk pei a nih.
16 Chun, nisa hnuoia thil um danghai khom ka hung hmu suok pei a:
Rorelna hmunah rîtlona a thrung a,
Indikna hmunah ritlona a thrung bok.
17 Lungrilin ka ngaituo a:
“Mi felhai le mi rilohai ro khom,
Pathienin la hung rèl a tih;
Iengkim thawna ding hun le
Thil iengkim thawna hun chu,
A la um ding a ni si,” tiin.
18 Mihriem nauhai chungthua chun, ram sa ang el an nizie an inhriet theina dingin Pathienin anni chu a fie a nih tiin ka ngaituo bok a. 19 Mihriem nauhai chana tlu khuorêl char chu ram sahai chan ding a ni ve a, chu chan chun an pahniin a nghak vé vè a nih. Pakhat a thi ang bokin a dang khom chu thi ve’ng a tih. Thuok laa hring vong an na, ram sa nĕka mihriem chan a văwng bikna a um nawh. Thil iengkim hi iengma lo vong a nih. 20 An rengin hmun khatah an kîr vong a, pilvuta inthoka siem an na, pilvutah kir nawk vong an tih. 21 Mihriem nauhai thlarau chun chung tieng pan a ta, ram sahai thlarau chun hnuoi tieng pan a tih ti tuin am a hriet?
22 Chuleiin, mihriem chun a thilthaw inhoi a ti nêka thra lem ieng khom a um nawh ti ka hmu suok a, chu chu a chan a nih. A hnunga thil hung umhai hmu dingin tuin am a hung thruoi kir thei ding?