Inhoina hi iengma lo a nih
2
1 Ka lungrilin, “Khaw tam, nuomsip hang chèn veng ka tih, ieng angin am a’n hoi hrim!” ka ta, sienkhom ieng khom a lo ni chuong nawh. 2 “Innui ringot hi thil invetthlak a nih. Hlimhlop ringot khom iem a hlawkna a um a?” ka ta. 3 Ka’n ngaituo fè hnungin, uoiin-a insukhlim ka tum a. Varna zong zing siin invêtna chu ka’n kuopui a. Chuong ang chun, van hnuoia mihaiin hringnun tawite sunga hlimna an hmu chu tong ve ka lo inbeisei a nih. 4 Thil tam tak ka thaw a, ka in ding ka bawl a, ka grep huon ding ka siem a. 5 Huon le lengna hmunhai ka siem a, theikung chi hrang hrang ka phun treu a. 6 Huon chawmtu dingin dil ka siem a. 7 Siehlawpa le siehlawnu ka’n chawk treu a, ka ina inthoka pieng siehlaw ruol ka nei bok a. Ka hmaa Jerusalema lo um tah po pohai nĕka tam bawng ruol le beram ruol ka nei a. 8 Tangkaruo le rangkachak le lalhai ro mi pekhai chu ka khawl khawm treu a. Hla sak thiem nunghak tlangval ka nei treu a, pasal lawmzawng hmei hmel thra tak tak ka nei bok a. 9 Chuongchun, ka hmaa Jerusalema lo um ta hlakhai po po ka khûm vong a, ka varna khom ka la kol zing bok a.10 Mita ka châk taphot chu,
Hlà ka nei naw hrim hrim a,
Hoithawnaa inhmang dingin,
Ka lungril ka khap ngai nawh.
Ka thaw inrimnaah ka lawm a,
Chu chu ka lawmman a nih.
11 Kuta ka thaw suokhai thlîr a,
Ka sin inrim ra ka en hin,
Thil iengkim hi iengma lo le
Thli hnot ang chauh a lo ni a,
Nisa hnuoiah hlawkna a um nawh.
12 Varna, invêtna le intlawknahai,
Ka lungrilin ka ngaituo a;
Lal khomin a hmaa lalhai thaw bàk,
Ieng am a thaw thei bik chuong a?
13 Var chu thim neka a thrat lem angin,
Varna chu invêtna nêkin a thra lem
Ti dam ka hung hmu suok a.
14 Mi var chun lu-ah mit a nei a,
Mi invêt chu thimthamah a lawn.
Sienkhom mi var le mi invêt khom,
Khuorĕl thuhmun intrawm vong an nih.
15 “Mi invêt chunga tlung chu,
Ka chungah tlung ve’ng a ta,
Iem ka var ka hlawkpui bikna?”
Ti dam ka ngaituo hlak a.
“Hi khom hi iengma lo a nih”
Tiin ka lungril ka hril a.
16 Mi var chu invêt ang bokin,
Hriet zing hlaw bik naw ni a,
Hun la hung tlung pei dinga chun,
Theinghil la ni vé vèng an tih.
Mi invêt ang bokin mi var chu,
A la thi ve ding a ni si a.
17 Nisa hnuoia thilthaw rêng rĕng hi mi sukrimtu a ni leiin, nun hi ka nghok a nih; iengma lo vong, thli hnot ang char a nih. 18 Nisa hnuoia ka thokrimna san po po hi ka hnunga hunghai ta dinga ka maksan el ding chauh a ni leiin, ka nghok a nih. 19 Ama chu mi var amanih mi invêt amani a ni ding tu am hre thei? Sienkhom, nisa hnuoia ka thokrimna ra po po neitu a hung ni ding a ni si. Hi khom hi iengma lo bok a nih. 20 Chuleiin, nisa hnuoia ka thokrimna po po chungah ka bei a dong tran a nih. 21 Varna le hrietna le thiemna hmanga nasa taka thokrimtu chun a thaw ve hrim hrim lo kuoma rochung dingin a maksan el ding a nih. Hi khom hi iengma lo le thil vangduoi thlak tak a nih. 22 Miin nisa hnuoia sawl taka a thawna po poa chun iem a hlawkpui a? 23 A dam sŭng po po chu rimsikna le tuorna vong a na, zana chen khom a lungril a chawl hadam chuong nawh. Hi khom hi iengma lo a nih.
24 Mihriem ta dingin fak le dawn le mani sina lungawi baka thra hi a lo um nawh. Hi khom hi Pathien kuta inthok a nih ti ka hung hriet tah. 25 Ama boin tuin am faa dawnin, inhoitiin um thei an ta? 26 Ama suklungawitu kuoma chun Pathienin varna hai, hrietna hai le lawmna hai a pêk si a. Mi suolhai ruok chu Pathien suklawmtuhai rochung ding la khawmtu le sêk khawmtuah a sor thung a nih. Hi khom hi iengma lo, thli hnot ang tho a nih.