THUHRILTU
Nun hi iengma lo a nih
1
1 Jerusalem lal, Davida naupa, Thuhriltu thuhai chu:2 Thuhriltu chun iengkim el hi Iengma lo,
Iengma lo takzet a ni vong, a ti a.
3 Nisa hnuoia mihriem sawlpui poa hin,
Ieng am hlawkna a hmu a?
4 Suon khat an liem, suon dang an hung,
Hnuoi ruok chu a pangngai zing.
5 Nisa a suok a, a tla nawk a,
A suokna tieng a pan nawk nghal.
6 Thli chu sim tieng a hrâng a,
Hmar tieng a hung kǐr nawk a,
A’n vir kuol a’n vir kuol a,
A lam ngaia bok a kir nawk.
7 Vadung tin tuipuiah a luong lut a,
Tuipui hlak a liem chuong nawh.
Tui chu a hung kir nawk a,
A luongna vadung bok hrawin,
Tuipuiah a kir nawk vong hlak.
8 Iengkim hi a sawlum thlak vong,
Hrilin a siek nawh.
Mitin hmù khop tik a nei naw a,
Nain hriet khop tik a nei bok nawh.
9 A um ta kha a hung um nawk a,
Thaw ta sa kha ei thaw nawk a,
Nisa hnuoiah thil thar a um nawh.
10 “En ta, hi hi thil thar a nih!”
Ti ding ieng am a um a?
Sawt taka inthoka um ta vong,
Ei um hma daia lo um tah a nih.
11 Tu khomin kha hma thil an hriet zing naw a,
Tu lai thil le la tlung ding pei khom,
A hnunga haiin hre zing naw nih.
Thuhriltu tonhriet
12 Kei, Thuhriltu hi Jerusalema Israelhai lal ka ni a. 13 Van hnuoia thil tlung tahai chu keima varna hmanga hmu suok tumin ka bei hlak a. Pathienin mihriem chana phur a lo siempek hi a rik ngot el. 14 Nisa hnuoia thil thawhai hi ka hmu vong a, iengkim el hi iengma lo le thli hnot ang chauh a lo ni vong.
15 A kâwi tah chu suktlŭn thei a ni naw a,
A um naw chu tiem sà thei a ni bok nawh.
16 “En ta u, ka hmaa Jerusalema lalhai po po nêka nasain varna tieng ka’n thranglien a, varna le hrietna khom ka hmang rawn lem” ka ti lungril a. 17 Ka lungril hi varna hre thiem ding le invêtna le intlâwkna hre thiem dingin ka hmang a, sienkhom chuong thilhai khom chu thli hnot ang chauh a nih ti ka hriet tah. 18 Varna hau chu lungkham rawnna,
Hrietna hau chu beidong rawnna a nih.