Lal Lemuel thuvarhai
31
1 Lal Lemuel thuvarhai, a nu’n a’n chuktirhai chu:2 “Aw ka naupa, aw ka rîla ra,
Ka thu intiemkamna ra suok,
3 Lalhai suksetu nuhmei suol lakah,
I hrâtna sêngin hmangthai naw rawh.
4 Aw Lemuel, uoiin dawn hi,
Lalhai thaw ding a ni naw a,
Lalhai thaw ding a ni dêr nawh,
Rorêltuhai khom zu hrât ngaiin,
An dang a chàr ding a ni nawh;
5 An dawn chun Dàn theinghilin,
Neksawrhai piengvo ngaitha rawi an tih.
6 Boral mekhai kuomah zu pe la,
Mi lungngaihai chun dawn raw se,
7 An pasietna chu theinghilin,
An rinum tuor theinghil raw se.
8 “Mani chungthu hril thei lo le,
Mi baivaihai chungchang thu khom,
Anni aia hrilpekin san hlak rawh.
9 Hrilpui la, thu inlai takin rêl la,
Rethei le baivaihai piengvo humpek rawh.”
Thukhârna: Nùpui fel
10 Nuhmei thra le inzaum chu,
Tuin am a hmu el thei ding?
Lunghlu sen rubi nêk daiin a hlu lem.
11 A pasalin a ringzo a,
Hlutna iengkim koltu a nih.
12 A dam sung hun po poin,
Sietna nêkin thil thra a hung intlun a,
13 Beram hmul le patzai a zong khawm a,
A kutin inhawk takin a khawng a.
14 Ram hlaa inthoka sumdawng long,
Fak ding hung phurtu ang a nih.
15 Khaw var hmain a tho a,
A sunghai zing bu a pêk a,
A siehlaw nuhai chen khom.
16 Huon ding ngaituon a’n chawk a,
A thaw suokin grep huon a siem a.
17 Thatho takin sinah a pu a,
A bân thàhai a sukhrăt a.
18 Hlawk ngei dingin sum a dawng a,
Zanah a khawnvar a mit ngai nawh.
19 A kutin hmûi kut chelin,
A kut khingin hmuithal a chel a,
Pat a kher a.
20 Mi retheihai ta din a thilphal a,
Mi vakvaihai a somdawl hlak.
21 Vûr tlâk hunah a sungkuohai,
An trithawng ve ngai dĕr nawh,
An rêngin thuom lum an nei si.
22 Khumpha mawi tak a khawng a,
Silfen to le puon sendukin a’n chei.
23 A pasal chu mihaiin an inza a,
Kul kota rorêltu upahai lai a thrang ve.
24 Silfen man to siemin a zor a,
A hrènchei khawng chu sumdawnghai a thon a.
25 Thilthawthei le inzaum tak a na,
Hun la tlung ding chu a ta din innuina a nih.
26 Var takin thu a hril a,
A bâu suok thu chu a ringum.
27 Insung khawsak a rĕl fel a,
Thabo inzam a thaw ngai nawh.
28 A nauhai thoin mal an sawm a,
A pasal khoma inpâkin:
29 “Nu tling tak tak an um a,
Nang chun i khûm zo vong” tiin.
30 Ngainobeina hi thil hlun lo a na,
Hmelthratna khomin a dai sawt nawh;
LALPA tritu nuhmei ruok chun,
Chawimawi a phu hlie hlie a nih.
31 A hlaw suok lawmman chu pe unla,
Khawpui kotkharah a thilthawhai leiin,
Mi tinin chawimawi raw hai se.