Agur thuvarhai
30
1 Jake naupa Agur thucha:Chu pa chun Ithiel kuomah.
Hieng hin a hril a:
“Ka bei a dong a nih, aw Pathien,
Ka bei a dong a nih, aw Pathien,
Ka chău let dĕr an tah.a
2 “Mi laia a mawl tak ka na,
Mi angin ka var ve naw a,
3 Varna ka’n chûk naw a,
Mi Thienghlim ka hriet bok nawh.
4 Tu am vanah lawna trum nawk?
Tu am kutpara thli fûn khawm thei?
Tu am puona tui fûn thei?
Tu am kawlri tin kham nghet?
A hming le a naupa hming iem?
A hrie in um chun mi hril ro.
5 “Pathien thu tin hi thudik a na,
Ama bêltuhai ta di’n phâw a nih.
6 A thuhai chu belsa naw rawh,
Chuong naw chun zil a ti che a,
Mi khêlhlip ni pal rawi i tih.
7 “Thil pahnih ka ngĕn che, LALPA,
Ka thi hma’n mi hnawlpêk naw rawh.
8 Indik nawna le thukhêl po po,
Ka laka inthok la hmang dai la,
Mi sukhausa naw la,
Mi sukpase bok naw rawh.
Ka mamaw tawk char buin mi chawm rawh;
9 Chuong naw chun tlai talawin,
‘LALPA in ti hi tu am a ni leh?’ tiin,
Inphatsan hlauh rawi ka ti che.
Ka rethei chun rûk dam inrûng ka ta,
Pathien hming sukpâwi rawi ka tih.
10 “Siehlaw chu a pu kuomah dem naw rawh,
Trongsie inphur hlauh a ti che a,
Thiem naw hlaw pal rawi i tih.
11 “Mani pahai trongse inphur dam,
Mani nuhai malsawm lo dam an um;
12 Mani tirdakumna sawp fai si loa,
Thienghlim ĕm êma inngai dam;
13 Ieng lai khoma meng chapo hlak,
Mi tham naw deua meng inlir dam;
14 Mi retheihai fakna dinga,
An ha kawlhnâm anga ngei,
Pasiehai soi nawina dinga,
An hapui chemte anga ngei an um.
15 “Invot chun nau nuhmei pahni a nei a,
‘Mi pe rawh, mi pe rawh’ tiin an khek a.
‘Thil pathum, khop tik nei lo an um a,
‘A hun tah’ ti ngai lo pali an um bok:
16 Thlăn khur, nuhmei ching sul,
Tui dit khop dong lo hnuoi châr,
‘A hun tah’ ti ngai der lo mei.
17 “Nau, mani pahai mit phielkhum a,
Nu thu awi loa nuisantu chu,
Phai vaâkin a mit la chuk dok an ta,
Mulukolhan a ruong la tlàn an tih.
18 “Thil pathum mak ka ti tawp lo le,
Thil pali ka hriet thei lohai chu:
19 Boruoka muvanlai fêna hnuhma,
Lungpuia rûl fêna hnuhma,
Tuipuia long fêna hnuhma,
Pasalin nuhmei a pawlna hnuhma.
20 “Hi hi a nih nuhmei uire um dan chu:
Mi a uirepui a, a’n sawp fai a,
‘Suol ieng khom ka thaw nawh’ a ti hlak.
21 “Thil pathum leiin hnuoi hi an hnìng a,
Thil pali a tuorhlaum a um:
22 Lala siehlaw inthrung,
Mi invêt, bu le sa hauh,
23 Nu theidaum pasal nei,
Siehlaw nunghak, a pi hlàntu.
24 “Hnuoia hin thil pali chikté tè,
Sienkhom var deu el an um:
25 Phâivâng: hrât naw sien khom,
Thrâlah fak ding an sekkhawl hlak;
26 Sangawi:b a chakvak nawa chuh,
Lungpui kak kâr inin a hmang;
27 Khau: lal an nei nawa chu,
A honin an tla khawm hlak;
28 Cholru: kuta man el thei a na chu,
Lal inah a chêng hlak.
29 “Thil pathum, an nawh, pali lem,
An chêt vela inza phur an um:
30 Sakeibaknei, ramsahai lal,
Tû hmaa khom hnungtol ngai lo;
31 Arkhong lawn theu theu; kelchal;
Lal, a sipaihan an ngir huol khup lai.
32 “Invêt taka nangma inchawisang a,
Thil suol thaw ding i lo phan a ni chun,
I kutin i bau hup rawh.
33 Bawngnene inluma chok zing chun,
A khal a hung suok hlak ang le,
Hnâr herin thisen a suok hlak angin,
Lungsena incho phawkin insuol a chok dok.”