29
1 Zil rop khoma rîng la sukkhong tlattu chu,Sukdam ruol loa suktliekpek thut la ning a tih
2 Mi fel an inlal pha mipui an lawm a,
Mi riloin ro an rèl pha mipui an inrûm.
3 Varna dittu nau chun a pa a sukhlim a,
Nawchizor inkoppuitu chun a suktlaran hlak.
4 Roreltu indik lal chun ram a suknghet a,
Thamna ngainatu ruok chun a suksiet.
5 A tuolbawm inpâk dertu chun,
A kea ding lên châng a kam a nih.
6 Mi thra lo chu a suolnan a awk a,
Mi fel ruok chun hlimin hla a sak.
7 Mi fel chun retheihai chan ding a dawnpui a,
Mi rilo ruok chun a dawnpui ve teuh nawh.
8 Deusawtuhai chun khawpui an chokbuoi a,
Mi felhai ruok chun lungsen an kei kir hlak.
9 Mi varin mi invêt a khing chun,
Invêt lungsen êltam rihâu a nat leiin,
Inremna a um thei hrim hrim nawh.
10 Thisen inrui mihaiin mi indik an theida a,
Mi ngîlhai chu that hmang dan an zong hlak.
11 Mi invêt lungsen chu a’n hrâwt hrep a,
Mi var ruok chun insûmin a’n khap dei hlak.
12 Rorêltuin thukhêl a ngaithlak chun,
A thoktu po po mi rilo an inchang hlak.
13 Pasie le nêksawrtu inthuhmunna chu,
LALPAN hmu theina mit a pek ve ve hi a nih.
14 Pasiehai chunga indik taka roreltu chu,
A lalna suknghet ni zing a tih.
15 Thununna hmol chun varna a’n tlun a,
Thunun lo nau chun a nu a sukmuolpho hlak.
16 Mi rilo an pung pha suolna khom a pung a,
Mi fel ruok chun an tluksiet hun la hmung a tih.
17 I nau thunun la, hadamna peng a ti che a,
I lungril dusăm intlunpek a ti che.
18 Hmulawkna a um nawna hmuna chun,
Mipui an inthlàdà hlak a,
Dan zawmtuhai ruok chu an hamthra hlak.
19 Siehlaw chu hril chaua thunun thei a ni nawh,
Hre thiem khom ni sien, ûksak naw nih.
20 Inhmaw taka thu hril puot puot i hmu hlak am?
Ama nêkin mi invêt lakah beisei ding a tam lem.
21 A chîn laia inthoka siehlaw duot suol chun,
A tawpah ro chen hung inchŭ pei a tih.
22 Thinsie chun innghirnghona a chok suok a,
Lunginrom mi chun suol tam tak a thaw hlak.
23 Mi chapo chu a chaponain a hnûk hnuoi a,
Lungrila inngaitlawm chun chawimawi a hlaw hlak.
24 Rûkru inkoppuitu hmĕlma chu ama a nih,
Thudik hril dinga intiemkam siin a hril ngam nawh.
25 Mihriem trîna hin a mi ăwk hlak a,
LALPA-a innghattu ruok chu a him hlak.
26 Mi tam takin lal inbiekpui an chăk a,
Indik taka rorêltu chu LALPA a ni lem si.
27 Mi felin mi ringum lo a ten a,
Mi riloin mi indik a ten bok.