SAM
Thuhma
Sam hi Thuthlung Hlui Baibula bu 19-na, kum sangkhat le zathum vêl sunga mi hrang hrangin hla le trongtraina an phuokhai laia 150 thlang khawm, chang 2461 a sei, a bua an siem, tempula Pathien chawibieknaa an hmang hlak a nih. Hebrai trong chun ‘Tehilim’ ti a na, chu chu ‘hla’ tina el a nih. Grik trongin ‘Psalterion’ an ta, chutaka inthok chun a hming hi a hung put tah a nih. A umzie chu hla, rimawi chi hrang hrang hmanga sak le rem chi tìna a nih. A thren chu thlûk neia siem le sak chi, a thren ruok chu insam chi a nih. Davida phuok 73 a um a, a danghai chu Mosie, Solomon, Asaf, Kora nauhai le Ethan an ni tak a, a phuoktu hriet chieng lo khom 49 a um.
Sam bua hin Pathien inpâkna le chawibiekna dam, sanhimna le huolhimna hnìna dam, suol thupha chawina le ngaidam hnina dam, lawmthu hrilna le malsawmna hnina dam, hmelmahai hrem dinga ngenna dam le mihriem le Pathien inlaichinna inkara thil um tam tak, a thren chu mi mal thil, a thren ruok chu hnam pumpui thil innêl taka hrilna thu a chuong a, hringnun darthlalang poimaw laia pakhat a nih. Isu ngei khomin Sam hi a hmang nasa a, a chanchin hril lawkna khom tam tak a um hrim a nih. Thuthlung Thar ziektuhai khoma an lam rawn pawl tak lekhabu a nih.
Sam hi bu ngaah an thre a, hieng ang hin:
Bu 1 (Sam 1-41)
Bu 2 (Sam 42-72)
Bu 3 (Sam 73-89)
Bu 4 (Sam 90-106)
Bu 5 (Sam 107-150)
Sam hi hla a ni leiin, tuta inleta hin tu khomin an la thaw ngai kher lo ding, hla kalhmang chauh khom ni loin hla ang chara tlar tin a thu inzat vonga sie a na, a tam lem hi tlar tinah thumal lam riet le lam sari peia sie a nih.