28
1 Mi rilo chu tu hnot loin a tlânse a,Mi fel chu sakeibaknei angin a huoi.
2 Ram sungah helna a suok pha,
Rorêltu an inthlàk zûr zut hlak a;
Hrietthiemna le hrietna hau mi ruok chun,
Buoina um loin ram a enkol hlak.
3 Pasiehai nêksawr mi roreltu chu,
Thlai dêng se vongtu ruopui vanawn ang a nih.
4 Dan bawsetuhan mi rilohai an inpâk a,
Dan zawmtuhai ruok chun an dodàl hlak.
5 Mi suolhan rorêlna dik an hriet thiem naw a,
LALPA zongtuhai chun iengkim an hriet thiem.
6 Nun khawkher hrawtu mi hausa ni nêkin,
Soisel boa kalchawitu mi rethei ni a thra lem.
7 Dan zawmtu nau chu lungvar nei mi a na,
Mi hnukrawlhai pawltu chu a pa sukzaktu a nih.
8 Sum pung la treua insukhausatu chun,
Mi retheihai lainatu ta dingin a khawl khawm a nih.
9 Tu khom dan bengkhon nawtu chu,
An trongtrainahai chen khom a tirdakum.
10 Lampui thra loa mi indikhai thruoitu chu,
Ama tlakkhur choa ngei chun tlâng a ta,
Soisel boa khawsatu ruok chun,
Thil thra dongin rochung a tih.
11 Hausahai chun var an inti hle a,
Lungvar nei mi rethei ruok chun,
Mani inhlĕm an nih ti a hmu tlang vong si.
12 Mi fel an inlal pha mi an hlim a,
Mi rilo an dingchang pha an inbi hmang.
13 A suolna iptu chu hmuingil naw ni a,
Inpuonga a sim ruok chun zangaina hmung a tih.
14 LALPA tri roptu chu a hamthra,
Mi lulul ruok chu sietnaah a tlu lut hlak.
15 Rorêltu rilo chu retheihai ta dingin,
Keipui inrum le savom mi hnot ang a nih.
16 Lal tawrot chun mi thil laklui a chîng a,
Hlawkna indik naw theidatu ruok chu,
A dam sung nihai sukseiin um a tih.
17 Tuolthat leia inthiem nawnain a hrem chu,
A thi chenin tlan se zing sien la,
Tu khomin hum naw raw hai se.
18 Soisel boa kalchawitu chu him a ta,
Nun khawkher hrawtu ruok chu tlu thut a tih.
19 A lo inlettu chun bu hau a ta,
Duthusam ringot hnottu chu retheinan sip a tih.
20 Mi ringum chun malsawmna dong rawn a ta,
Hausak thut tumtu chu hrem loin suok naw nih.
21 Thlei bik nei hi a thra nawh-
Bei hlek chunga khom thaw suol thei a nih.
22 Mi tiksie chun hausak vat a châk a,
Pasietnan a nghâk zing ti a hriet si nawh.
23 Mi ziltu chun mi inpâk dertu nêkin,
A tawpah mi ngainat hlaw lem a tih.
24 Mani nu le pahai rok a,
“Iengkhom a suolna a um nawh” titu chu,
Sukbohmangtu ruol thra a nih.
25 Mi duâm chun innghirnghona a chok suok a,
LALPA-a innghattu ruok chu hmuingil a tih.
26 Mani lungrila innghattu chu mi invêt a na,
Var taka kalchawitu ruok chu a him hlak.
27 Pasehai somdawltu chu tlasam ngai naw ni a,
Mit insîmsantu ruok chun trongsie phur treu a tih.
28 Mi rilo an dingchang pha mihai an inbi a,
Mi rilo an ram pha leh mi fel an pung hlak.