27
1 Zinga thil ding uongpui naw rawh,Zingin iem a her suok ding i hriet si nawh.
2 Mani bâua mani inpak loin,
Mi dangin inpâk lem raw hai se che,
Nangma hmûra inthok ni loin,
Hmel hriet lo hmûra inthok ngeiin.
3 Lung hi a rik a, phaiphin hi a khǐn a,
Mi invêt chophawkna chu an pahni nekin a rik lem.
4 Lungsenna hi a râwng a,
Lungsen intûr lem chu a phul buon buon a,
Sienkhom thîkna chu tuin am tuor zo a ta?
5 Hmangaina suklang loa thup nêkin,
Tlang taka inkawk dam hi a hlu lem.
6 Ruolin a mi’n hliemna chu,
Ei ta dinga a ringum lei a na,
Hmêlma mi fâwp ruok chu a der a nih.
7 Khop lai chu khuoizu khom ei hnâm a,
Trâm lai chu thil khá khom a’n hnik vong.
8 In le lo ngaisak loa daurăp chu,
A bu op lum hman lo vate ang a nih.
9 Hriek rimtuiin lungril a suklawm angin,
Lungrila suok ruol thra thurawn pek chun,
Lungril a sukhlim hlie hlie hlak.a
10 I ruol le i pa ruolhai nghatsan naw la,
Sietna i tuokin i unau kher pan naw rawh.
Rala unauhai nêkin tuolbawmhai an hlu lem.
11 Ka naupa, var la, ka lungril suklawm rawh,
Mi hrilsetuhai chu ka don lĕt theina dingin.
12 Remhre mi chun tritna a hmu pha a’n saseng a,
Mi mawl chun a tawn a, a tuor pha hlak.
13 Hriet lo mi ta dinga dakhama insietu silfen chu la la,
Nu thra lo lakah a ni lem chun a silfen chu dakhamah sie rawh.
14 Zîng hmânga inring vuola venghai malsawm chu,
Trongsie inphur ang charin ngai an tih.
15 Nuhmei inhal hmang chu ruo nichîng ang a nih;
16 Khap dei tum chu thli hup dè tum ang le
Kuta sahriek fùn dè tum ang a nih.
17 Thîrin thîr bok a sukngei thei angin,
Mihriemin mi dang a tât ngei hlak.
18 Theichang kung enkoltu chun a ra fa’ng a ta,
A pu enkoltu chun chawimawi hlawn’g a tih.
19 Tuiah hmel thla a’n lang angin,
Mihriem lungril chu mihriemah a’n lang.
20 Thina le Sietnan khop tik an nei naw a,
Mihriem mit khomin khop tik a nei nawh.
21 Suongtuina bêl chu tangkarawa ding a na,
Rawtuina pûm chu rangkachaka ding a na,
Mihriem fiena chu inpâk a hlawnaah a nih.
22 Mi invêt chu bu rawtna lunga rawtin,
Sumah fahrelin suk hrep khom ni la,
An vètna chu sukkhè chuong naw ti nih.
23 I beramhai ngirhmun hre chieng la,
I ran ruol fimkhur takin enkol rawh;
24 Hausaknan kumkhuo a dai naw a,
Lalna khomin thrang tin a dai bok nawh.
25 Hlobet an ât a, der thar a hung insuo a,
Tlânga inthokin ran bu an lak khawm hlak.
26 Beramhai chu silfen phuhrûktu ding,
Kêlhai ruok chu lo man ding an nih;
27 I sungkuo chawmna dingin,
Kêl nenetui tam tak sawr i ta,
I siehlaw nunghakhaiin tlan bok an tih.