26
1 Nipui laia vûr tlak le busik huna raw sur chu,Thil inhmè lo a ni ang bokin,
Mi invêt le chawimawina hi thil inhmè lo a nih.
2 Chongzong vuong kuol le peleu inlêng angin,
A san boa trongsie inphur chu a’n lĕng kuol hlak.
3 Vuokna hruol chu sakor ta ding a na,
Thirbar chu sabengtung ta ding a na,
Hmoltum chu mi invêt ruongzănga ding a nih.
4 Mi invêt zawna invĕt i don pei chun,
Ama anga invêt hung ni pal rawi i tih
5 Mi invêt chu an vĕt dan angin don rawh,
Chuong naw chun varah inngai rawi a tih.
6 Zuolkoa mi invêt tir chu,
Mani ke tan bong a,
Nunrawngna tui dawntu ang a nih.
7 Thuvar hi mi invêt baua chu,
Ke zeng thên ang mei mei a nih.
8 Mi invêt chawimawi a trangkai nawh,
Saihlia saihlûm khit dè ang a nih.
9 Thuvar hi mi invêt bâua chu,
Zurui kuta hling lut ang a nih.
10 Mi invêt le mi lênglak sor chu,
Thal kâptun thala a fŭk pal pal,
A kâp hliem ang el hi a nih.
11 A luoka bok ui a kir nawk angin,
Invêtin thil invet an thaw non hlak.
12 Var si loa vara inngai mi nêkin,
Invêtin beisei ding a la hau lem.
13 Thabo chun, “Lampuiah keipui a um,
Kotthlêrah keipui a’n vâk” a ti hlak.
14 Kotkhar chu kopzaa inthlung a ni angin,
Mi thabo khom a khum leh an inmat hlak.
15 Mi thabo chun buthleng a pur a,
Bu beng dingin kut a hlăng pei si nawh.
16 Fimkhur taka thu hril hlak mi pasari nêkin,
Mi invêt chun var lem daiah an ngai.
17 Lam laka mi buoinaa inroltu chu,
Ui tuol leng lai naa lo mantu ang a nih.
18 Mi invêt, thingthu hringa mi nor a,
Thi theina thala mi kâptu chu,
19 Mani tuolbawmhai hlĕm a,
“Ka fiemthu a nih” titu ang char a nih.
20 Thingthu bo chun mei a rêm ang hin,
Inlawt tuo a um nawnaah inhal a rè hlak.
21 Meihol a tam leh mei a’n ling thra a,
Thing ei buk rawn leh mei a chok nasat angin,
Inhal hmang tamnaah buoina a pung hlak.
22 Inlawt indem hi bu inhnik tak ang a na,
Mihriemin ei dol lut zung zung el hlak.
23 Hmŭr thiem, lungril suol put si chu,
Dâr tuia pil bêl zût tlĕt ang a nih.
24 Mi vervêkin theidăna a păi rŭk chu,
Trongkam thrain a thup thiem hlak.
25 A trongkam thlum awi naw rawh,
A lungrilah tirdakum pasari a pai.
26 A theidana pai chu thup thiem sien khom,
A rîtlona chu tlâng hrieta phor lang ni tho a tih.
27 Tlâkkhur chotu chu ama khur choah tlâng a ta,
Lung inhlumtu chu a chungah hung inhlum lêt a tih.
28 Lei khêlhlip chun a’n hliemhai chu a theida hle a,
Inpâk derna hmûr chun sietna a’n tlun hlak.