Solomon thuvar dang
25
1 Hienghai hi Solomon thuvar dang,Judai ram lal Hezekia mihaiin,
An ziek thlak sawng chu a nih:
2 Pathien ropuina chu a thil thup a na,
Lalhai ropuina chu a thil thup zong suok a nih.
3 Van insang a, hnuoi a’n thuk ang bokin,
Lalhai lungril khom sui suok ruol a ni nawh.
4 Tangkaraw êk po i pei hmang chun,
A sertuin thil thra hung ser suok a tih;
5 Lal bula inthokin mi rilo po son hmang la,
A lalna chu felnaa suknghetin um a tih.
6 Lal hmaah invor lăr tum naw la,
Milienhai laia thrung inchŭ naw rawh;
7 Milienhai hmaa insukhmaimawk nêkin,
Thrungna thra lema inthrung dinga fiel ni a thra lem.
8 I mit ngeia i thil hmuhai khom,
Rorêltu kuomah intlun inhmaw naw rawh;
A tawpah i tuolbawmin sukmuolpho sien che,
Ieng am i law hrim ding a na?
9 I tuolbawm leh in inkhing khomin,
Hmai intonin in thu hrilpui la,
Mi dang thurŭk chu hril suok ngai naw rawh;
10 A lo hretuin sukmuolpho hlau a ti che a,
I hming siet rè ta ngai naw nih.
11 Thu a ni dân taka hril suok hi,
Tangkaruoa rangkachak hlûm phŭm ang a nih.
12 Mi var zilhalna chu a ngaithlatu ta dingin,
Rangkachak nabe le thrî ang a nih.
13 Palai ringum chu a tirtu ta dingin,
Bu sîk huna vûr dei ang a na,
A puhai lungril a sukhar song song hlak.
14 Thilpêk pe dinga intiem, pe si lo chu,
Sûm tui pai lo thliin a lên ang chauh a nih.
15 Dawtheinain rorêltu lungril a hnĕ thei a,
Trong innĕmin rŭ khom a dĕng tliek thei.
16 Khuoizu i hmu chun a huntawk char fa rawh,
I fak rawn taluo chun inluok rawi i tih.
17 An khăt tawk chauin i tuolbawmhai sir rawh,
I sir inzing talaw chun nghok an ti che.
18 Mani tuolbawmhai thu khêla hĕk chu,
Hmol, kawlhnâm le thal inzum tak ang a nih.
19 Buoi nikhuoa mi ringum lo ringsana hmang chu,
Ha nâ le ke ru inpelsol ang a nih.
20 Mi lungngai laia hla sakkhum chu,
Dei laia silfen lakpek ang le,
Hliemna bea changal bur ang a nih.
21 I hmêlma phìng a trâm chun bu pe la,
A dang a châr chun dawn ding pe rawh.
22 I pek chun a luah meiling i sie khawl ning a ta,a
LALPAN lawmman peng a ti che.
23 Hmar thliin ruo a hung thruoi hlak angin,
Mi dem hmang leili chun lungsen hmêl a kei pung.
24 Nuhmei hrangsie le in hluo nêkin,
In chung kila um a thra lem.
25 Ram hla taka inthoka chanchin lawmum hriet chu,
Châu dangcharin tui dei a’n khiet ang hi a nih.
26 Mi rilo hmaa mi fel tlawm chu,
Tuikhur suksiet le tuihnar sukporche ang a nih.
27 Khuoizu dawn rawn taluo a thra naw ang bokin
Chawimawi hlaw tum talaw khom hi a thra nawh.
28 Mani inthunun thei lo mi chu,
Khaw kul bang chim ang a nih.