Sawmpakuona
24
1 Mi rilohai inhnar naw la,Anni lai thrang châk bok naw rawh;
2 Inpawngnêkna ding ngot an dap a,
An hmŭrin mi poi ngot a hril hlak.
Sawmhnina
3 Varna hmanga sungkuo hi indin a na,
Inhrietthiem tonna hmanga suknghet a nih.
4 Insung chu ro hlu le mawi tinrenga,
Hrietna hmanga sung sip a nih.
Sawmhnipakhatna
5 Mi varin nasa takin thil a thaw thei a,
Hrietna nei chu awmkhau nekin a hrat lem.
6 Ral do dingin râl rêl thiem a ngai a,
Rem ruot thiem hau chu râl hnèna a nih.
Sawmhnipahnina
7 Kul kotkhara mipui pungkhawmnaa
Thupui vai phak ve lo ta ding chun,
Varna hi ban phâk ruol a ni nawh,
Sawmhnipathumna
8 Thil thra lo phier hlaktu chu,
Miha’n mi khel siet hmangah an ngai.
9 Thil thra lo phier hi suol a na,
Mi hmusit chîng chun hnăm a kâi.
Sawmhnipalina
10 Buoi mangangah i tlep el chun,
Hrătna i nei tlawm hlè a nih.
Sawmhnipangna
11 Thi dinga an thruoi lai chu san suok unla,
That dinga an somhai chu hnûkkir ro.
12 “Kan lo hriet ve le!” ti naw ro.
Lungril bûktu’n a hmu naw ding cheu maw?
In thlarau vengtun a hriet naw ding maw?
Mi tin an thil thaw angin a rul naw ding maw?
Sawmhniparukna
13 Ka naupa, khuoizu dawn rawh, a thra si a,
A thlâra inthoka far ngei chu inhnik i ti kha.
14 Varna hi i hringnun khuoizu a nih ti hre la,
I man fuk chun hma tieng beisei ding nei i ta,
I beiseina chu thlawn ngai naw nih.
Sawmhnipasarina
15 Suomhmang angin mi fel in inchân naw la,
A chêngna in rok ngai naw rawh,
16 Mi fel chu voi sari tlu sien khom,
A hung tho nawk pei hlak a,
Mi rilohai chu sietnan a nel hlak.
Sawmhniparietna
17 I hmelma tlŭk diriem naw la,
An sui chăng i lung lawm naw raw se.
18 LALPAN hmuin dit nawng a ta,
A chunga a lungsen rĕ rawi a tih.
Sawmhnipakuona
19 Mi suolhan i lung sukhnûr naw sien,
Mi rilohai inhnar ngai naw rawh
20 Mi suolin beisei ding a nei naw a,
Mi rilo khawnvar chu sukmit ning a tih.
Sawmthumna
21 Ka naupa, LALPA le lal chu trì la,
Anni laka helhai chu thlop naw rawh;
22 An chungah sietna intlungtir thut an ta,
A rapthlak dingzie tu am hre thei?
Mi var thuhril danghai
23 Mi var chun hienghai khom hi a hril:
Rorêlnaah thlei bik nei a thra nawh.
24 Mi rilo kuomah, “Poi i tawk nawh” titu chu,
Miin trongsie inphur an ta,
Hnam tinin tirdak an tih.
25 Thiem naw inchangtirtu ruok chu lawm an ta,
Malsawmna tam tak vûrin um bok a tih.
26 Donna indik tak pek chu,
Hmûra infawp ang a nih.
27 Puo tienga i sin chu thaw zo la,
I lohma iengkim rêl fel diem la,
Chu zoah i in ding indin rawh.
28 A san boin i tuolbawmhai thubuoiah,
A kal zawngin hrepuituah thrang ngai naw la,
Khel hrilnan i hmŭr hmang naw rawh.
29 “Ka chunga a thaw ang charin,
Hang thungrul ka tih” ti ngai naw rawh.
30 Mi thabo lo ka hraw tlang a,
Rem hre lo grep huon ka sir bok a,
31 Hmun tin hlingin a bawm sip a,
A hnuoi thrŭlin a tuom phui vong a,
A dai lung bang a chim thla vong.
32 Ka thil hmu ka thlir lai chun,
Inchûk ding thil a mi pĕk a:
33 ‘La hang zâl met ka tih,
Kut hmasuiin, hadam takin,
La’n zam met ka tih’ i ti sung khan,
34 Pasietna chun rukru angin,
Hung nang thut a ti che a,
Tlaksamna khomin râl angin,
Hung nangchîng thut a ti che.