Parukna
23
1 Rorêltu leh thlaithlĕng in kîl chângin,I hmaa um kha en fimkhur la,
2 Trăm leia i beng tuom tuom chun,
Hnuk le chemte chuktuo ang ning a tih.
3 Dawha ruoi a ni thei hre zingin,
A’n hnikna ngot hnot naw rawh.
Pasarina
4 Hausak tum leiin insuk-kulcho naw la,
Inhmang dan chintawk hre dingin var rawh.
5 Hausakna chu i hmu vuoi a, a bo nawk dai a,
Mupui thla put ve ang elin,
Van tieng a vuong hmang nawk thut hlak.
Parietna
6 Mi tikse inah bu fa ngai naw la,
Thil inhnik a neihai chu inhnar naw rawh;
7 A sèng zàt ding ngot sût mi a na,a
“Fain dawn treu rawh” ti sien khom,
A lungrilin a ti tak tak dĕr nawh.
8 I fak tah tlawmte khom luok suokin,
Inpâk thlawn pal hlau rawi i tih.
Pakuona
9 Mi invêt chu ieng khom hril naw rawh,
I thuvarhai chu iengah ngai naw nih.
Sawmna
10 Pipu ramri lungphun son naw la,
Fahrahai ram nêk bok naw rawh,
11 Anni Humtu chu a hrât a,
Anni tranin an chungthu hrilpui a tih.
Sawmpakhatna
12 A zirtirnaah i lungril innghat la,
Hrietna thu tieng i na daw rawh.
Sawmpahnina
13 Naupang thununah intîm naw rawh,
Hmola i vuok leiin thi naw nih.
14 Hmol hmangin hrem la,
Seola inthokin a thlarau san suok i tih.
Sawmpathumna
15 Ka naupa, i lungril a var chun,
Ka lungril lawm takzet a tih.
16 I bâuin thu indik a hril chun,
Ka thlarau lawm takzet a tih.
Sawmpalina
17 Mi suolhai inhnar rûk naw la,
LALPA trina tieng thrahnem ngai pei lem rawh.
18 Hma tieng beisei ding nei i ta,
I beiseina thlawn ngai naw nih.
Sawmpangana
19 Ka naupa, ngaithla la, var rawh,
Lampui indikah i lungril sie tlat rawh.
20 Uoiin hè mi inkoppui naw la,
Sa hè mihai lai inzêl bok naw rawh;
21 Zu le sa hè mi chu hung rethei an ta,
Muchukin zakaw triek hâk an tih.
Sawmparukna
22 A hringtu che i pa thu zawm la,
I nu a upat pha hmusit naw rawh.
23 Thudik inchaw la, zor ta naw rawh;
Varna, inthununna le hriet thiemna nei rawh.
24 Nau fel neitu chu nasa takin a hlim a,
Nau var neitu chu a nau chungah a lawm hlak.
25 I chungah i nu le pa lawm hai sien,
A hringtu che chu sukhlim hlak rawh.
Sawmpasarina
26 Ka naupa, i lungril mi pe la,
Ka lampui chauh bi ngar ngar rawh.
27 Nawchizor chu tlâkkhur inthuk tak ang a na,
Nuhmei suol chu tuikul inchêp tak ang a nih;
28 Suomhmang angin mi an inchàn a,
Pasal ruol lai bawsietna an sukpung.
Sawmparietna
29 Tu am chungpik, tu am lungngai,
Tu am buoina nei, tu am thubuoi nei,
Tu am trûl loa hliem tuor hlak,
Tu am mit meng sen rûm hlak chu ?
30 Sawt tak tak uoiin thrung chil a,
Zu chokpol dawn hlakhai an nih.
31 Uoiin sen, no-a phul sar sar lai dam,
Inhnik ti taka an lem lai dam en naw rawh.
32 A tawpah rûl angin mi a chuk a,
Rûlngân tûr angin mi a fang hlak.
33 I mitin thil mak tak tak hmung i ta,
Thil inzom lo tak tak ngaituong a ta,
34 Tuipui insok chunga zâl ang le
Long ngul sîpa zâl ang el ning i tih.
35 “An mi loka chu a na nawh,
An mi vuoka chu ka hriet nawh!
Ieng tik am kei hi tho harin,
Dawn ding ka hmu ding?” ting i tih.