Thuvar sawmthum lawr khawm
22
1 Hming thrat hi sum tam tak nêkin a ditum lem,Mi ngaihlut ni khom tangka le rangkachak nêkin.
2 Rethei le hausa an inthuhmunna chu,
LALPA kutsuok vong an nina hi a nih.
3 Remhre mi chun tritna a hmu pha a’n bi a,
Mi mawl chun a tăwn a, a tuor pha hlak.
4 Inngaitlawm la, Pathien trì rawh,
Hausakna, chawimawina le hringna a nih.
5 Mi rilo lampui chu hling le changing a sip a,
Nun vong him nuomtu chun a hnai ngai nawh.
6 Naupang chu a lampui ding inchuktir la,
A upat pha khom pêtsan ngai naw nih.
7 Mi hausahan pasehai chungah thu an nei a,
Thil pûktu chu a’n pûktirtu siehlaw a nih.
8 Hleineina tŭtû chun buoina sîk a ta,
Mi chunga a lungsenna hmol inlet chu,
Suktliekpek la ni’ng a tih.
9 Mi tiktlai chu malsawmin um a tih,
Mi retheihai bu a pêk hlak leiin.
10 Hmusittu hnot suok la, innghirnghona bo a ta,
Inhal le inbiek sisaw hai khom re’ng a tih.
11 Lungril thienghlim puthai le
Hawihawm le mi biengbiek thiem chun,
Lal chu ruolah nei a tih.
12 Hrietna nei mi chu LALPAN a hum tlat a,
Mi khêlhlip thu ruok chu a pei thlăk hlak.
13 Mi thabo chun, “Tuolah sakeibaknei a um,
Ka suok chun mi se hlum a tih” dam a ti hlak.
14 Nu leplêr bâu chu tlâkkhur inthuk ang a na,
LALPA lungsenna phurtuhai chu tla lût an tih.
15 Naupang lungrila invêtna bu khuor chu,
Thununna hmola hnot suok thei a nih.
16 Hausak nuom leia pasehai nêksawr a,
Mi hausa thama tlon chu tlakranna a nih.
Mi var thuhrilhai
17 I na dawin, ka thuhai hi ngaithla la,
I lungrilin ka hrilhai hi vong rawh;
18 I vong zing chun lawm hleng i ta,
A hunah hril sawng thei i tih.
19 LALPA ringa amaah i’n nghat theina dingin,
Voisun hin i kuoma ngei ka hril a nih.
20 Thurawn le hrietna thuvar sawmthum,
Ka ziekpek diem che a ni hih.
21 Chu taka chun thudik ring tlâk hrieng i ta,
Thudik zong suok dinga an tir phâ che,
A donna indik tak hre thei i tih.
Pakhatna
22 Pasiehai rok naw rawh, an rethei si a,
Rorêlna inah tlasamhai pal zŭt naw rawh.
23 LALPAN an thu a hrilpui ding a na,
Sirdètuhai chu hung sirdè ve’ng a tih.
Pahnina
24 Mi nunsie ruolah siem naw la,
Lungsen hmang inkoppui naw rawh,
25 A nungchang la pal i ta,
Intâng song hlauh rawi i tih.
Pathumna
26 Leibat rul di’n intiemkam naw la,
Dakhamah insie ngai bok naw rawh;
27 A thungna ding i nei si naw chun,
I zălkhum chen làkpêk an ti che.
Palina
28 Tiena in pi le puhai lo phun,
Ramri lung son ngai naw rawh.
Pangana
29 Mani sin thiem i hmu hlak am?
Lal kuomah sin thawng a ta,
Mi naranin sor phâk naw ni hai.