21
1 Lal lungril chu LALPA kuta tui hnàr ang a na,A nuomna tieng tieng a’n luongtir hlak.
2 Miin a lampui tin indikin a hriet hlak a,
LALPA ruok chun a lungril a sui hlak.
3 Thil fel tak le indik taka thaw hi,
Hlànbiekna nêkin LALPAN a dit lem.
4 Mit meng sâng le lungril chapo hi,
Mi riloin hmatheaa a hmang a na,
Chu chu thil suol a nih.
5 Mi taima tum lawk a hlawtling hlak a,
Hmawsaruma thaw mi chu a tlaran ngei hlak.
6 Khêla hausak chu tuihu inzâm,
Ral nawk el hlak ang hi a na,
Thìna châng trium a nih.
7 Mi rilohaiin thil indik,
An thaw nuom tlat naw leiin,
An nunrawngna chu an chungah,
A hung tla lĕt hlak a nih.
8 Thiem naw changtu lampui chu a kikawi a,
Poi tawk lo lampui ruok chu a thra ngǐl hlak.
9 Nuhmei inhal hmang le in hluo nêkin,
In chung kila um a thra lem.
10 Mi rilo chun suol thaw a châk dop dop a,
A tuolbawmhai laka khom zà an ngai chuong nawh.
11 Hmusittu ei hrem chun mi mawlhai an var pha a,
Mi var ei inchuktir chun a hriet sap pha treuh hlak.
12 Mi Indiktak chun mi rilohai in a’n chik a,
An chungah sietna an tlungtir hlak.
13 Mi retheihai khĕk ri ngaithâtu chu,
A khêk ve pha leh ngaithă ni vêng a tih.
14 A rûka thilpêkin lungsen a thawi dam a,
Nasa taka lungsen khom tham lungawi thei a nih.
15 Fel taka ro a fe pha mi indikhai an lawm a,
Thil suol thawtuhai ruok chu an chi-ai hlak.
16 Hrietthiemna lampui pêtsantu chu,
Mithi ruol lai khawsa vêng a tih.
17 Nuomtawl thlâkhlatu chu rethei a ta,
Zû le sa ngainatu chu hausa naw nih.
18 Mi rilohai chu mi felhai intlanna’n hmang an ta,
Mi ringum lohai chu mi indikhai intlanna dingin.
19 Nuhmei hrangsie le inhal hmang le chĕng nêkin,
Thlalèra um a thra lem.
20 Mi var chêngnaah rosum le hriek a um zing a,
Mi invêt ruok chun a chên ral vong pei hlak.
21 Felna le hmangaina hnottuhai chun,
Hringna, felna le chawimawina an dong hlak.
22 Mi var chun mi hrâthai khawpui a rûn a,
An ringsan tak kulpui chu a sukchim hlak.
23 Tu khom a bâu le lei vêng thratu chun,
Siet theina lakah a nun a vêng him a nih.
24 Mi chapo hming chu ‘Hmusittu’ a na,
Chin lĕm nei loa uongin thil a thaw hlak.
25 Mi thabo chun ieng khom a thaw pei naw leiin,
Ruol inhnar rêng rĕngin a thi hmang hlak.
26 Mi rilo inhnarna chu a pung ni tin a,
Mi fel chun inro loin a sem suok hlak.
27 Mi rilo hlânbiekna chu LALPAN a tirdak a,
A thaw san a thra naw a ni lem chun,
Tirdak a va um zuol awm ngei de!
28 Hrepuitu der chu bohmang a ta,
A thu awituhai khom kumkhuon bohmang an tih.
29 Mi rilo chu a meng inrum a,
Mi indik chun a lam hraw a ngaituo hlak.
30 Varna, hrietthiemna le remruot iengkim,
LALPA kalzawng chu a hlawtling ngai nawh.
31 Sakor chu indona dinga buotsai a na,
Hnèna ruok chu LALPA ta a nih.