20
1 Uoiin hi nuizatbûra mi siemtu a na,Zu hrât chu insuol khêkna siemtu a na,
Zu dawi vĕta um chu a varthlak nawh.
2 Lal lungsen chu keipui inhûk ang a na,
A suklungsentu chun hringna a chân hlak.
3 Insukbuoina laka fihlim hi inzaum kaina a na,
Mi invêthai ruok chu an inrol phèt hlak.
4 Mi thabo chun a hunah hnuoi a’n let ngai naw a,
A sîk hunah sîk ding a hmu ngai bok nawh.
5 Li anga inthuk mihriem lungril tum chu,
Varna neitu chun a man suok vong hlak.
6 Mi tam tak ringumin an insâl hlak a,
Mi ring tlâk tak chu tuin am hmu zo a ta?
7 Soisel boa nun khaltu mi fel chu,
A hnung zuitu a thlahai an hamthra.
8 Ro rêl dinga lal a thrung pha chun,
Thil thra naw po po a hmu fai hlak.
9 “Ka lungril ka vong thienghlim a,
Suol lakah ka fihlîm” tuin am ti thei?
10 Bûkna lung le inkhǐna no indik lo chu,
Pathienin a theida ve ve.
11 Naupang khom a chêt fel le indik danin,
A mizie ding a’n lang vong a nih.
12 Hriet theina na le hmu theina mit hai hi,
LALPA siem vong a nih.
13 Imu i thlâkhlà chun rethei i ta,
I har zing chun fak seng lo nei i tih.
14 Thil inchawtuin, “A thra nawh, a thra nawh” a ta,
A fe pha a thil inchawk chu a suong vieu si hlak.
15 Rangkachak le lunghlu rubi a tam a,
Thu var ruok chu lunghlu vàng tak ang a nih.
16 Hnam dang bat rulpêk intiemtu silfen chu,
Dakhama sie dingin lapek rawh.
17 Thil fâk rŭk chu inhnik hlê khom ni sien,
A tawpah bâua lung thril hnaw sip ang a nih.
18 Mi berawnin thil ruohmang hlak la,
Var taka râl rêl hmasa zetin bei hlak rawh.
19 Mi bâu tam chun thuruk a ip thei naw a,
Chuleiin, mi bâu tam chu pawl naw rawh.
20 Nu le pahai trongsie inphurtu chu,
Thim sa lâi tak a khawnvar mit a tih.
21 A tîra rosum hau thut mihai chun,
A tawp tieng malsawmna dong naw ni hai.
22 “Ka poi i tawk hi la thungrul ka ti che”
Ti ngai hrim hrim naw ro,
LALPA nghak unla, a man san suok a ti cheu.
23 Bûkna indik lo hi LALPAN a theida a,
Inkhîna indik lo khom a thra nawh.
24 Ei kalchawi tin hi LALPA remruot a na,
Tuin am a lampui ding hre thei a ta?
25 Thu intiem thuta a hnunga ngaituo chauh hi,
Mani le mani insukkolawkna a nih.
26 Lal var chun mi rilohai a zâp lêng a,
Tawlailirin a’n chîltir tawl hlak.
27 Mihriem sungah LALPA khawnvara sie chun,
A sungril inthuk tak chenin a èn suok hlak.
28 Hmangaina le ringumnain lal a vong him a,
A lalthrungpha chu hmangainaa suknghet a nih.
29 Tlangvalhai ropuina chu an hrâtna a na,
Upahai mawina chu an lu truok a nih.
30 Hliem khopa invuokin simna a’n tlun thei a,
Vuok hrepin sungril chen khom a tleng fai hlak.