19
1 Mi invêt le khêlhlip ni nêkin,Mi rethei, dem kai loa kal chawitu ni a thra lem.
2 Hrietna nei si loa phŭr hlut hi a thra nawh,
Pawng inhmawa kalchawi chu a’n suithluk hlak.
3 Threnkhatin an invĕtna an sietpui a,
LALPA mawin a chungah an lungsen hlak.
4 Hausak hi ruol hauna a na,
Rethei chu ruol khomin an zamsan hlak.
5 Hrepuitu der chun hrem tuor ngei a ta,
Khêl hril chǐngin hrem pumpel naw nih.
6 Tiktlâi lakah tam takin tlăktlum an inchu a,
Mi tin hi thilpêk petu ruolah an inchang hlak.
7 Mi rethei chu a sunghai hmana an nghok chun,
A ruolhai lem chun an va hnawl nasa awm de!
Anni chu ko lom lom hlak sienkhom,
A bul hnaia hrim an um nuom nawh.
8 Mani hringna hmangaitu chu mi var a na,
Hrietthiemna koltu chu a hmuingil hlak.
9 Hrepuitu der chun hrem pumpel naw nih,
Khêl hril hmang khom bohmang a tih.
10 Khawsak insang le mi invet an inhmè naw a,
Milien chunga siehlaw inlal an inhmè naw zuol.
11 Mi var chu a lungsen mei mei naw a,
A poi an tawk a haider thei chu a ropuina a nih.
12 Lal lungsen chu keipui inrûm ang a na,
A ditsakna chu hlobeta daidaw tla ang a nih.
13 Nau invêt chu a pa tlakranna a na,
Nuhmei hrangsie chu raw chîng ang a nih.
14 In le lo chu nu le pahaia inthokin ei rochung a,
Nuhmei thra ruok chu LALPA mi pèk a nih.
15 Mi thabo chu a in chur chur a,
Mi zomthaw chun phingtrăm tuor a tih.
16 Thupek zawmtu chun nun a vong him a,
A ngaithâtu ruok chu bohmang a tih.
17 Rethei lunginsiet hi LALPA kuoma thil inpuktir ang a na,
A thil thaw thrat chu Aman la rul vong a tih.
18 Beiseium a la ni laiin i nau chu thunun rawh,
Chuong naw chun a thi i remti tìna a nih.
19 Lung inrom chun a nunsiet man hmung a ta,
I san suok khomin i thaw nawk pei ngai a tih.
20 Thurawn ngaithlain, thupek zawm la,
A tawpah mi var hung ning i tih.
21 Mihriem lungrilin tum a hau a,
Sienkhom, LALPA remruot chauh a dingchang hlak.
22 Mihriema thlâkhlàum chu a ringumna a na,
Mi khêlhlip nĕkin mi rethei ni a thra lem.
23 LALPA trì hi hringna a na,
A trìtu chu lungawi takin an um a,
Thil thra loin tlâkbuok naw nih.
24 Mi thabo chun buthleng a pur a,
Bu beng dingin kut a hlăng pei si nawh.
25 Mi dêusaw chǐng chu vaw la,
Mimawl chu hung fimkhur pha’ng a tih;
Hrietthiemna nei mi i zil chun,
A hrietna hung pung a tih.
26 A pa rok a, a nu hnot suoktu nau chun,
Inzakna le muolphona a’n tlun hlak.
27 Ka naupa, zirtirna i ngai pei naw pha chun,
Hrietna lampuia inthokin pêt hmang i tih.
28 Hrepuitu porche-in rorêlna a nuisaw a,
Mi rilo bâu-in suolna a dol thlăk zung zung.
29 Hremna chu nuisawtu ta ding a na,
Vuokna chu invêthai ruongzànga ding a nih.