18
1 Mal tla mi chun mani hmakhuo chauh a siel a,Thurawn thra khom a tai vong hlak.
2 Mi invêt chun hrietna a ngaina naw a,
A ngaidan khûkpui chauh a hlimpui.
3 Rîtlona chu muolphonan a zui a,
Muolphona khom inzaknan a zui.
4 Mihriem bâu suok chu li inthuk ang a na,
Varna tuikhur chu tui luong hok hok ang a nih.
5 Mi rilo chunga hlei nei a thra naw ang bokin,
Poi tawk lo thiem naw inchangtir a thra nawh.
6 Mi invêt hmûr chun inhalna a chok dok a,
A bâu suok chun vuok a’n tuortir hlak.
7 Mi invêt chun a bau a sietpui a,
A hmûr chu a ta dinga châng a nih.
8 Inrèl hi bu inhnik tak ang a na,
A dolin ei dol thlak zot zot hlak.
9 Sinthawa inthlàdà mi chu,
Suksetu le unau bul an nih.
10 LALPA hming chu kulbing nghet a na,
Mi fel chu a tlân lut a, a him hlak.
11 Mi neinunghai kulpui chu an hausakna a na,
Lung bang insang tak angin an inngai hlak.
12 Lungril chapo chu sietna leh an intlon a,
Inngaitlawm chu chawimawinan a som hlak.
13 Ngaithlak hmaa mi don chu,
Thil invêtthlak le muolphona a nih.
14 Nat khom mi’n tuortir theitu chu lungril a na,
Lungril hliem chu tu nam tuor thei tang a ta?
15 Lungvar nei chun hrietna a khawl khawm a,
Mi var nâ chun hrietna a zong hlak.
16 Thilpêk chun a petu hma a sukkawpek a,
Mi lien khom olsam taka paw theina a nih.
17 Mi dang hunga an hung khing let hma chun,
Thiem thu hril hmasatu chu indikin a’n lang hlak.
18 Thrum vawrin inkhingna a rem a,
Inkhing bur bur khom a kei thrè hlak.
19 Unau suknuor chu kul nghet nêkin hnè a’n tak lem a,
Inhal chu thir tluona kul kotkhar kalh ang a nih.
20 I bau suok dungzuiin khop i ta,
I hmŭr suok ra zirin tlai i tih.
21 Lei hin damna le thi theina a pâi a,
A hmangtu chun a ngainat ang ra chu a sîk hlak.
22 Nuhmeia nei ding zong hmutu chun thil thra a hmu a na,
LALPA ditsakna a dong hlak.
23 Mi rethei chun rienginko takin thu a hril a,
Mi hausa ruok chun chaltlai takin a lo vîn hlak.
24 Ruol hau chu sietpui thei a na,
Sienkhom unau nêka inhnaipui lem ruol an um hlak.