17
1 Inrem le hadam taka bu thring ring chu,Inhal puma ruoipui thrè nêkin a thra lem.
2 Muolpho taka khawsa nau chungah,
Siehlaw varin ro rêl a ta,
Unau laia thrang ve ang elin,
Pa ro khom chang vĕng a tih.
3 Tangkaruo le rangkachak chu,
Pŭma an raw thienghlim angin,
Lungril fietu chu LALPA a nih.
4 Mi rilo chun hmûr khelhlip a ngaithlak a,
Mi khêlhlip chun inhrilsietna thu a bengkhon hlak.
5 Pasehai hmusittu chun anni Siemtu a hmusit a,
Mi sietna diriemtu chun hremna pumpel top naw nih.
6 Tû le tèhai hi upahai lallukhum an na,
Nauhai ropuina chu an nu le pahai an nih.
7 Thu hril thiem le mi invêt an inhmè naw a,
Rorêltu bău le khêl an inhmè naw zuol.
8 Thamna hi a petu chun dawi angin a ngai a,
A lekna tieng tieng a hlawtling hlak.
9 Mi khingtu ngaidam hi ngainat hlawna a na,
Bau suktam chu ruol sukthrèna a nih.
10 Mi invêt voi za vuok nêkin,
Lungvar nei voi khat zil a hlawk lem.
11 Mi suol chun hel tieng ngot a awn a,
A kuomah thuneitu nunrawng tir ning a tih.
12 Invêtin thil invèt a thaw lai tong nêkin,
A te làkpèk savom le intuok a thra lem.
13 Suola thratna rultu insung chu,
Thil thra loin chèng chil a tih.
14 Inhal hi tuiting inthrè ang a na,
A buoi zuol hmain inhal ma rawh.
15 Mi suol thiem inchangtir le
Mi thra thiem naw inchangtir hi,
LALPAN a tirdak ve ve a nih.
16 Mi invêt kuta sum sie chu,
Ieng am a trangkaina a um a?
A var pha awm top si nawh.
17 Ruol chun a mi hmangai zing hlak a,
Laibung chu mangang huna ding an nih.
18 Mi leibat rulpek dinga intiem a,
Tuolbawm ta dinga dakhama insie chu,
Thil invĕttthlâk tak a nih.
19 Inhal chîng mi chun suol a ngaina a,
Kotkhar insang bawltu chun sietna a fiel a nih.
20 Lungril kawi chu a hmuingil ngai naw a,
Lei khêlhlip chu buoinaah a tlu lut hlak.
21 Nau invêt chu lungngaina intluntu a na,
A chungah a pain lawmna hrim a nei nawh.
22 Lungril hlim hi damdawi thra tak a na,
Lungril ngui chun rù le châng a suktrawl.
23 Mi rilo chun arûkin thamna a lâk a,
Indik takin ro a rĕl thei nawh.
24 Lungvar nei chun varna a hnot zing a,
Mi invêt chun kil le kapah mit a’n lèn hlak.
25 Nau invêt chun a pa a sukbeidong a,
A hringtu a nu lung a sukrim hlak.
26 Poi tawk lo lei inchawitir chu a’n dik nawh,
An ringum leia thoktu lien hrem khom.
27 Hrietna nei mi chu a trong fimkhur a,
Hrietthiemna nei mi chu a dei dap hlak.
28 Mi invêt khom a to chun var a hlaw a,
A lei a vêng lem chun mi rila ngai a ni hlak.