16
1 Mihriem lungrilin thil a riruong a,Sukpuitlingtu ruok chu LALPA a nih.
2 Mihriemin a lampui indikin a hriet hlak a,
Sienkhom, thiltumhai bŭktu chu LALPA a nih.
3 I thaw iengkim chu LALPA-ah innghat la,
I tumhai chu hlawtling a tih.
4 Iengkim hi LALPAN san neia a siem vong a na,
Mi rilohai khom hi sietna nia ding an nih.
5 Lungrila chapohai chu LALPAN a tirdak a,
Hremna pumpel naw top an tih ti hre chieng rawh.
6 Hmangaina le ringumnain bawsietna a tleng fai a,
LALPA trìna leiin miin suol a pumpel hlak.
7 A um dana LALPA suklawmtu chun,
A hmêlmahai khom inrem takin a umpui thei.
8 Fel lo taka sum tam tak nei nêk chun,
Indik taka tlawmte nei a thra lem.
9 Mihriem lungrilin a lampui ding a duong hlak a,
A kalchawi thruoitu ruok chu LALPA a nih.
10 Chung tieng thu anga rorêltu lal chun,
A kam suokin ro rêl suol ngai naw nih.
11 Bŭkna le inkhǐna indik chu LALPA ta a na,
Ip rikna po po khom ama siem vong a nih.
12 Lalhan thil suol thaw an tirdak,
Lalthrungpha chu indiknaa indin a ni si a.
13 Tlang taka thu hril mi chu lalin an lawm a,
Thutak hril mi chu an hlutsak hlak.
14 Lal lungsen chu thǐna zuolko a na,
Mi var chun lo suklungawi a tih.
15 Lal hmêl hlim chun nun a suokhoi a,
A ditsakna chu thrâla sûm tui pai ang a nih.
16 Varna hi rangkachak nêkin a thra lem a,
Hrietna hi tangkaruo nekin a hlu lem.
17 Mi indik lampui chu suol leh an inpaw naw a,
Mani lampui vêngtu chun a hringna a vêng a nih.
18 Chapona chu sietnain a zui a,
Lungril indŭna chu tlûknain a zui.
19 Mi chapo le ral lak sum insem nek chun,
Inngaitlawm taka pasehai laia khawsak a thra lem.
20 Zirtirna thu poisatu chu a hmuingil a,
LALPAA innghattu chu a hamthra.
21 Lungvar neihai chu sungril mit varna nei mi an na,
Trongkam thlum chun zirtirna a sukhlawk.
22 Hrietthiemna hi a neitu ta dingin hringna tuikhur a na,
Invêtna ruok chun invethai chungah hremna a’n tlungtir hlak.
23 Mi var lungril chun a bâu chàng a thruoi a,
A hmûrin varna thu a zirtir hlak.
24 Trong thlum chu khuoizu thlăr ang a na,
Lung a suklawm a, rù le châng a sukhrisel.
25 Mihriem ngaia lampui indik ni awma inlang,
Sienkhom a tawpah thina intlun hlak si a um.
26 Sinthawtu chu a phing khopna dingin a’n rim a,
A phingtrămna chun sin a’n thawtir a nih.
27 Mi hmangna bo chun suol thaw ding a phier hlak a,
A kam suok chu meichok inhlap ang a nih.
28 Mi lûtinle chun innghirnghona a chok suok a,
Indem chìng chun ruol bul khom a sukthrè hlak.
29 Tharum thaw mi chun a khuo le vênghai a sukhmu a,
Lampui thra loah a thruoi hlak.
30 Mi mitsîr chîng mi chun thil suol a phan hlak a,
Hmûr liek chîng mi chun suol tieng a ăwn hlak.
31 Lu intruok hi lallukhum ropui a na,
Mi felhai dong hlak chu a nih.
32 Mi ralhrâng nêkin mi zaidawthei ni a thra lem a,
Khawpui latu nĕkin lungsen kei dei thei mi ni a thra lem.
33 Mal chungah thrum ei vawr hlak a,
Thu tlûkna ruok chu LALPAA inthok vong a nih.