15
1 Donna innĕm chun lungsen a thawi dam a,Invǐn ruok chun lungsen a chok tho.
2 Mi var bâu chun varna thu a hril a,
Mi invêt lei chun thu invêt a per suok.
3 LALPA mit chu hmun tinah a fu a,
Mi rilo le mi thra khom a enthlak zing.
4 Bâu innêm chu hringna thing a na,
Lei lûtinle chun lungril a dĕng koi hlak.
5 Mi invêt chun a pa thununna a ngainêp a,
Zilna poisatu ruok chun lungvar a nei a nih.
6 Mi fel inah rosum tam tak a um a,
Mi rilo sum lam chun buoina an tlun hlak.
7 Mi var hmûr chun hrietna a thè dar hlak a,
Mi invet chun thaw vena lungril a nei nawh.
8 Mi rilo hlanbiekna chu LALPAN a tirdak a,
Mi thra trongtraina chun a suklawm.
9 Mi rilo lampui chu LALPAN a tirdak a,
Felna lampui hrawtu chu a ngaina.
10 Lam indik pêtsantu chu na taka thunun a ni hlak a,
Zilhauna theidatu chu a bohmang hlak.
11 Seol le Abadon hre tlangtu LALPA chun,
Mihriem lungril lem chu a hriet chieng awm de aw!
12 Hmusittu chun zilhauna a ngaithei naw a,
Mi varhai khom a biekrawn ngai nawh.
13 Lungril hlimin hmêl hlim a siem a,
Lungril nain thlarau a sukngŭi.
14 Sungril mit varna neitu chun hrietna a zong a,
Mi invêt ruok chun khêl ringot buin a ring hlak.
15 Hnawchêp nun chu a rimsikthlak a,
Lungril hlim ruok chun ruoi a thrê zing a nih.
16 Hausa hnûra buoina nei nek chun,
Tlawmte neia LALPA tri a thra lem.
17 Intheida puma bawng tuoi thau sa fak nekin,
Inhmangaia thlai hna ring a thra lem.
18 Lunginromin inhalna a chok suok a,
Lunginuoiin inhalna a sukrè hlak.
19 Mi thabo lampui chu hlingin a bawm a,
Mi indik lampui ruok chu a tluong zâl.
20 Nau var chun a pa a suklawm a,
Nau invêt ruok chun a nu a hmusit hlak.
21 Hrietna tlasam chun a’n vêtna a hlimpui a,
Hrietna neitu ruok chun lam ngîl a hraw hlak.
22 Remruot lawk loa thilthaw chu a tlol nuom a,
Rem hrie an tam ruok chun a hlawtling hlak.
23 Donna indik pek hi tu khomin an lawm a,
A hun taka dong hi a va hang lawmum de aw!
24 Mi var chun Seol a zuk fin nawna dingin,
Chung tieng a pan tung ngat ngat hlak.
25 LALPAN mi chapo in chu a nam thlŭk a,
Hmeithâi chêngna ramri ruok chu a humpek.
26 Mi rilo ngaituona chu LALPAN a tirdak a,
Mi thienghlimhai ngaituona chun a suklawm.
27 Hlêpnaa hnukrawlin insung a chok buoi a,
Thamna theida ruok chu sungkaw damna a nih.
28 Mi fel chun thu don dan ding a bûktuo a,
Mi invêt ruok chun thu thra lo a sâk suok hlak.
29 LALPAN mi rilo chu a hlat a,
Mi fel trongtraina ruok chu a ngaithlak.
30 Hmêl hlimin mi a suklawm a,
Thu lawmumin rù le châng a sukhrisel.
31 Nun siem thra thei zilna ngaithlatu chu,
Mi varhai lai chêng vêng a tih.
32 Zilna ngaithâtu chun ama a’n ngainĕp a,
Zilna poisatu chun hrietthiemna a chang hlak.
33 LALPA tri hi var inchûkna a na,
Inngaitlawm hi chawimawi hlăwna a nih.