14
1 Nuhmei varin insung a’n din a,Nuhmei invêtin a kut ngeiin a thriek.
2 Indik taka kalchawitu chun LALPA a tri a,
Rîtlona lam hrawtu ruok chun a hmusit hlak.
3 Mi invêt chun vuok tuorna ding a hril suok a,
Mi var ruok chun a himna ding a hril lem hlak.
4 Bawngchal um nawnaah bawng in a ruok a,
Bawngchal thä an sornaah bu an thar treu hlak.
5 Hrepuitu ringum chun khêl a hril ngai naw a,
Hrepuitu der ruok chun khêl a sâk suok hlak.
6 Hmusittu chun varna a zong a, a hmu naw a,
Lungril mit varna neitu ta din hmu a olsam hle si.
7 Mi invêt lakah inthier fihlim rawh,
A hmŭra inthokin varna thu dong naw ti nih.
8 Mi varhan an lam hraw ding an ngaituo fimkhur a,
Mi invêthai invêt chil ruok chu inhlèm a nih.
9 Mi invêthan suol nghatsantu an hmusit a,
Mi varhai ruok chun an lawmpui hlak.
10 Mani chauin ei lungngaina ei hriet a,
Ei lawmna khom mi dangin an mi’n trăwmpui thei nawh.
11 Mi rilo sungkuo chu suksietin um a ta,
Mi indik sungkuo chu dingchang a tih.
12 Mihriem ngaia lam indik a um a,
Sienkhom thina lampui a lo ni zing thei.
13 Innui lai khomin lung a na thei a,
Hlimna khom lungngainan a tawp thei.
14 Mi suolin a suol man intêl a ta,
Mi thrain a thrat man hmung a tih.
15 Mi mawl chun mi hril phot a awi a,
Mi var chun a kal pên tin a bi chieng hlak.
16 Mi var chu a fimkhur aa, suol a hnawl a,
Mi invêt chu an sukhuoi a, a che rok rok hlak.
17 Lung inrom chun thil invêtthlak a thaw hlak a,
Dawhaa thil phantu chun theida a hlaw hlak.
18 Mi mawlhai chu invêtnan an inthuom a,
Mi var chun hrietna tonlairang an ton hlak.
19 Mi suolhai chu mi thra hmaah kûn an ta,
Mi rilohai chu mi fel kot bulah kûn an tih.
20 Pasiehai chu tuolbawmhai khomin an hnawl a,
Mi hausa ruok chun ruol an hau êm êm.
21 Tuolbawmhai hmusittu chu mi suol a na,
Tlasamhai somdawltu chu mi hamthra a nih.
22 Thil suol rottu chun thil suol a thaw a,
Thil thra zongtu chun mi ring le lainat a hlaw.
23 Thokrimna chun hlawkna a’n tlun a,
Hril ringota tlâk tum chu tlakranna a nih.
24 Mi varhai lallukhum chu an hausakna a na,
Mi invêthai chun invêtna chauh an hring suok.
25 Hrepuitu indik chun mi a san suok a,
Hrepuitu der ruok chun mi a hlêm hlak.
26 LALPA tritu chun kulpui nghet a nei a,
A nauhaiin inhumhimnan an hmang hlak.
27 LALPA tri hi hringna tuikhur a na,
Thǐna chânga inthoka himna a nih.
28 Mipui hau hi lal ropuina a na,
Khuo le tui nei lo lal chu a se dêr hlak.
29 Lung infuol chun hrietthiemna ril a nei a,
Mi lung inrom chun a’n vetzie a phor lang hlak.
30 Lungril hadam chu taksa sukhriseltu a na,
Thîkthu siet chu ru sukhmontu a nih.
31 Retheihai neksawrtu chun anni Siemtu a hmusit a,
An chunga ngilneitu chun anni Siemtu a chawimawi.
32 Mi rilo chu a suolna’n a bûk thlŭk a,
Mi fel chu thi chenin a ringumnan a hum hlak.
33 Hrietthiemna nei mi chun lungvar a nei a,
Mi invêt ruok chun thuvar a hriet thei nawh.
34 Indiknain hnam a chawi sang a,
Suol chu hnam tin sukmuolphotu a nih.
35 Siehlaw var chungah lal a lawm a,
A sukmuolphotu chungah a lungsen hlak.