13
1 Nau var chun a pa thununna a poisa a,Nuizattu chun hal a ngai thei nawh.
2 Mi thra chun bau thrat man a dong a,
Mi suol chun rawng taka chĕt a châk.
3 Lei vêngtu chun a nun a vĕng a,
Hmŭr tlahol chun sietna a tuok hlak.
4 Mi thabo phîng a hung trăm a
Sienkhom fak ding a nei si nawh,
Mi taima phing ruok chu a tlai zing.
5 Mi indikha’n khêl an theida a,
Mi rilohai hung intlun ruok chu,
Muolphona le inzakna a nih.
6 Mi ringumhai lampui chu,
Indikna chun a vèngpèk a,
Mi suol chu rîtlonan a suot thlak.
7 Hausa tak anga khawsa,
Iengkhom nei si lo an um a,
Rethei tak anga khawsa,
Hausa hlé si an um bok.
8 Mi hausa chu ama sumin,
Ama an tlan suok thei a,
Mi rethei ruok chun ieng khom,
Inlau thawngpui ding a nei nawh.
9 Mi felhai chu an êng var pam a,
Mi rilohai khawnvar ruok chu,
Sukmitpekin a um hlak.
10 Chaponan inhalna chauh a hring a,
Thurawn latu chun varna a kol hlak.
11 Indik loa hausak thut chu,
A riral tiel tiel hlak a,
Damtê tea khawltu ruok chu,
A nei a pung tiel tiel hlak.
12 Beiseina tlung inhnûk hin,
Lungril a sukrim hlak a,
Duthusàm tlung kim ruok chu,
Nunkhaw hringna thing a nih.
13 Zirtirna hnawltu chun tuor a ta,
Thu zawmtun lawmman hmung a tih.
14 Mi var inchuktirna chu,
Hringna fiertui hnàr a na,
Thǐna châng pumpelna a nih.
15 Hrietthiemna thra tak nei hi,
Mi ditsak hlawna a na,
Mi depdê lampui ruok chu,
A kholin a kholkham a nih.
16 Mi fimkhur thilthaw hrim hrim,
Hrietna hmangin a thaw hlak a;
Mi invêt thilthaw ruok chun,
An vêtzie a phor lang hlak.
17 Thangko riloin buoina a chok suok a,
Palai ringumin damna thu a’n tlun hlak.
18 Thununna ngaithâtu chu,
Retheiin muolpho a ta,
Keithruoina zawmtu ruok chu,
Chawimawiin la um a tih.
19 Duthusàm hmu hi a hlimum hle,
Invêt ruok chun suol nghatsan an theida.
20 Mi var pawltu chu a hung var ve a,
Mi invêt le inpawl chu sietna a nih.
21 Vangduoinan mi suol a hnot zui a,
Mi fel lawmman chu hnienghnarna a nih.
22 Mi thrain a tûhai ro ding chen a maksan a,
Mi suol sum khawl ruok chu mi felin nei a tih.
23 Mi retheiin bu a thar suok treuh thei,
Sienkhom rorêl suol leiin a chân vong thei.
24 Hmol hmang nawtu pa chun,
A nau a theida a nih;
A nau hmangaitu ruok chun,
Fimkhur takin a thunun ngei hlak.
25 Mi felhan dŭtâwka fak ding nei an ta,
Mi rilo phîng ruok chu trâm rop a tih.