12
1 Thununna ngainatu chun hrietna a ngaina a,Zilhalna theidatu ruok chu mi intlaw a nih.
2 Mi thra chun LALPA ditsak a hlaw a,
Suol phiertu chun thiem naw a chang.
3 Rîtlonan mi a siem nghet ngai naw a,
Mi fel chu sukhning ruol a ni nawh.
4 Nu thra chu a pasal lallukhum a na,
Nu inzapuium chu a rù chiptu ngè a nih.
5 Mi fel thil rĕl chu a’n dik hlak a,
Mi rilo thurawn pek chu a khêlhlip.
6 Mi rilo bauin that ding a’n chàn a,
Mi fel kam suok chun a san suok hlak.
7 Mi rilo chu pei hmangin an um a,
Mi fel sungkuo chu an ngir nghet.
8 Mi var chun chawimawi a hlaw a,
Lungril kawi chun endong a hlaw.
9 Insukliena fak ding nei si lo nêkin,
Hriet hlaw loa siehlaw nei thei a thra lem.
10 Mi fel chun a ranhai mamaw chen a ngaisak a,
Mi rilo zangaina insuo ve ruok chu a râwng hlak.
11 Mani loa sinthawtu chun bu le bâl hau a ta,
Duthu ringot sâmtu chun varna a tlasam a nih.
12 Mi suolin mi rilohai thil rok a’n hnar a,
Mi fel ruok chun zung a kei nghet hlak.
13 Mi suol chu a kam tlêuah a tlu a,
Mi fel chun buoina a pumpel hlak.
14 Mi bau thiemhai kam suok chu,
Ra thra tinrêngin a sip a;
An kut sawl man an hmu ngei hlak.
15 Mi invêt chun a lampui indikah a ngai a,
Mi var ruok chun thurawn a ngaithlak hlak.
16 Mi invêt chun lungsen a suklang nghal a,
Mi var ruok chun theida naw sak sak a thaw hlak.
17 Mi ringum chun thudik a hril hlak a,
Hrepuitu der chun thukhêl a hril hlak.
18 Trong tlahol chun kawlhnâm angin a sun a,
Mi var bau suok ruok chun lung a thawi dam.
19 Thutak hrilna bâu chun kumkhuo a dai a,
Lei khelhlip chun mit khap kar chau a daih.
20 Suol phantu lungrilah hlĕmna thu a um a,
Remna zongtuhai lungrilah hlimna a um.
21 Sietnan mi felhai a tlâk buok ngai naw a,
Mi suolhai chun buoina an tuok rop hlak.
22 Hmùr khêlhlip hi LALPAN a theida a,
Mi indikhai ruok chu a ngaina.
23 Mi fimkhur chun a hrietzie a thup a,
Mi invêt chun a’n vêtzie a puong dar hlak.
24 Mi taima chun rorêlna chel a ta,
Mi thabohai chu suokin sor a tih.
25 Lungkham nei hin a mi sukrik a,
Thu zaidam ruok chun a mi sukhlim.
26 Mi fel chun ruol pawl a fimkhur a,
Mi rilo chun mi a thruoi hmang hlak.
27 Mi thaboin a sa kap a raw ngai naw a,
Mi taima chun thil hlu a nei treu hlak.
28 Felna lampuia chun hringna a um a,
Chu lampuia chun thǐna a um nawh.