11
1 Bŭkna indik lo hi LALPA theida zawng a na,Bŭk lung indik hmang hi a lawmzawng a nih.
2 Chapona chu muolphonan a zui a,
Inngaitlawmna chu varnan a zui.
3 Mi ngîlhai chu an ringumnan a thruoi a,
Depdehai chu an dawha thŭrin a suksiet.
4 Lungsenna nia dingin,
Ieng hausakin thû a phur nawh,
Nisienkhom indikna ruok chun,
Thǐnaa inthokin a san suok hlak.
5 Mi indikhai chu an indiknain,
An lampui a suktluong hlak a,
Sienkhom mi rilohai ruok chu,
An rîtlonan a bûk thluk hlak.
6 Mi indikhai chu an felnan a san him a,
Depdehai chu châkna suolin a awk hlak.
7 Mi rilo chu a thi ruolin,
A beiseina khom a boral nghal a,
Thaw thei dinga a hisaphai khom,
Iengma lo a hung inchang hlak.
8 Mi fel chu buoina laka humin a um a,
Mi rilo chungah buoina chu a tla lem hlak.
9 Pathien ngaisak lo mi bau chun,
A tuolbawmhai a suksiet hlak a;
Mi fel ruok chun hrietna hmangin,
Sietna chu a pumpel hlak.
10 Mi felhai an hmuingil pha,
A khaw nawtin an hlim hlak a;
Mi rilohai an thi pha ruok chu,
Lawmna ri a so vêl hlak.
11 Mi indik malsawmna dong chun,
A khaw pumpui a chawimawi a,
Mi rilo bâu suok ruok chun,
A khaw nawtin a dêng siet hlak.
12 Tuolbawmhai deusawtu chun,
Varna a tlasam a nih,
Hrietthiemna neitu ruok chun,
A bâu a vĕng thra lem hlak.
13 Mi bau tamin thurûk a ip thei nawh,
Mi ringum ruok chun a vong tlat hlak.
14 Inthruoina thra um nawnaah,
Ram le hnam a tlu se hlak a,
Remruot thiem an tamnaa chu,
Hnèna an chang ngei ngei hlak.
15 Mi dakhama insietu chun tuor a ta,
Inthier fihlimtu ruok chu him a tih.
16 Nuhmei fel chun inzà a phur a,
Nu lepchie chu inzàpui a um.
Mi zomthaw chu a hung pasie a,
Mi hrât chu a hung hausa hlak.a
17 Mi ngilneiin a ngilneina zar a zo a,
Mi tawrot chu mani buoina siemtu a nih.
18 Mi rilo chun hlaw indik lo a lâk a,
Felna tùtu’n lukhawng a dong hlak.
19 Felna chel tlattu chu hring a ta,
Suolna hnot tlattu chu thi’ng a tih.
20 LALPAN lungril kăwi a theida a,
Soisel boa khawsahai chu a lawm.
21 Mi riloin hrem pumpel naw ni a,
Mi fel ruok chu san suok ning a tih.
22 Nu hmêl thra fimkhur lo chu,
Vok hnâra rangkachak hnâr kuol,
Inbuntir ang hi a nih.
23 Mi fel ditzawng chu thil thrain a tawp a,
Mi rilo beisei chu lungsennain a tawp.
24 Phal taka pèk hi a tam lem hmùna a na,
Mamaw bâk kompui chu tlakranna a nih.
25 Mi tiktlâi chu hmûingil a ta,
Tuia chawmtu chu tuia chawm ve ning a tih.
26 Hlawkna hnot leia bu inrotu chu,
Mihaiin trongsie inphur an ta,
A pe suok nuomtu ruok chu,
Malsawmna vùrin um a tih.
27 Thil thra zongtu chun thil thra a hmu a,
Thil suol zongtu chun thil suol a tong hlak.
28 Hausaknaa innghattu chu tlûng a ta,
Mi fel ruok chu hna hring angin inthrang no a tih.
29 Mani insung chokbuoitu chun thli chauh sîk a ta,
Mi invêt chu mi var siehlawah thrang a tih.
30 Mi fel ra suok chu hringna thing a na,
Nunrawngna chun hringna a lâk hlak.b
31 Mi felin an phù ang hnuoiah an hmu chun,
Mi rilo le mi suolhai lem lem chun,
An phù ang an va hmu zuol awm de!