Solomon thuvarhai
10
1 Nau varin a pa a suklawm a,Nau invêtin a nu a sukbeidong.
2 Indik loa hmu hausakna chun,
Hlutna ieng khom a nei naw a,
Indik taka thilthaw ruok chun,
Thi ding khom a san suok hlak.
3 Mi felhai phingtrăm ding chu
LALPAN a phal ngai naw a,
Mi rilo duthusam khom,
A hlawtling a phal bok nawh.
4 Mi thabo chu rethei a ta,
Mi taima chu hausang a tih.
5 Nau var chun nipui hunah,
Fak ding a sêk khawm hlak a,
Busîk huna zâl hlak ruok chu,
Nau inzapuium a nih.
6 Mi indik lu chunga chun,
Malsawmna vurin a um a,
Mi rilo bau suok ruok chu,
Nunrawngna thuin a sip.
7 Mi indik hriet zui zing chu,
Malsawmna a ni hlak a,
Mi rilo hming ve ruok chu,
A thu hmon vong hlak a nih.
8 Lungrila varna neitu chun,
Thupêkhai chu a zawm a,
Mi invêt bau tam ruok chu,
Sietna leh an intuok hlak.
9 Mi fel kalchawi a nghet a,
Lam suol hrawtuhai ruok chu,
Man suokin an um ngei hlak.
10 Mi mit rak hin lung a khei,
Tlang taka kawktu ruok chun,
Inremna a siem lem hlak.
11 Mi indik kam suok hai chu,
Hringna tuikhur an inchang a,
Mi rilo kam suok ruok chu,
Nunrăwngna thuin a sip.
12 Intheidàna hrim hrim chun,
Innghirnghona a hring a,
Hmangaina chun tlàk nawna,
Iengkim a hmu khûm lem hlak.
13 Lungril mit varna neihai
Băuah thu var a suok hlak;
Hrietthiemna nei lo ruongzăng chu,
Vuokna hmol le inmat a nih.
14 Mi varin hrietna an khawl khawm a,
Invêt chun sietna ding an hril hlak.
15 Mi neinunghai kul nghet chu,
An hausakna a ni hlak a;
Mi retheihai sietpui ruok chu,
An pasietna chu a nih.
16 Mi felin an hlaw an hringpui a,
Mi suol hlaw chu hremna a nih.
17 Inthununna poisatu chun,
Hringna lampui a hraw a,
A ngai thei nawtu ruok chun,
A pêt hmangsan lem a nih.
18 Theidàna iptu chu mi khêlhlip a na,
Mi dem chìng chu mi invêt a nih.
19 Ei trong rawn talaw pha chun,
Hril suol a thrang sa tèi hlak;
Mi var chun trong a’n sŭm hlak.
20 Mi indikhai kam suok chu,
Tangkaraw thra chi ang a na,
Mi rilo lungril ruok chun,
Hlutna ieng khom a nei nawh.
21 Mi indik kam suok thu chun,
Mi tam tak a chawm tlai a,
Mi invêt chu varna tlasamin a thi.
22 LALPA malsawmna intlun chu,
Hausakna a ni hlak a,
Harsatna a zep sa ve ngai nawh.
23 Mi invêt chun suol thaw inhoi a ta,
Hrietthiemna neitu chun varna a hlimpui.
24 Mi riloin a trî tak intuokpui a ta,
Mi felin a duthusam hmung a tih.
25 Thlipui a hung hràng phâ leh,
Mi rilohai a nuoi bo hlak a,
Mi fel chu an nghet tlat hlak.
26 Thil thaw dinga mi thabo tir chu,
Uoiin thûrin hä a suktrim ang le,
Meikhuin mit a sukthǐp ang a nih.
27 LALPA tri hi dam sawtna a na,
Mi suol dam kum ruok chu a tawi.
28 Mi fel tong ding chu hlimna a na,
Mi rilohai hmabâk ruok chu,
Boralnain a tawp hlak.
29 LALPA lampuia kalchawi hi,
Mi fel ta di’n himna kulpui,
A’n bìkna kul nghet a na,
Thil thra naw thawtuhai ruok chun,
Sietna chauh an hmasuon hlak.
30 Mi fel chu ngîr nghet an ta,
Mi suolin ram hluo zing naw nih.
31 Mi fel bauin varna a phù suok a,
Lei khêlhlip chu ăt tan ni’ng a tih.
32 Mi felin pom tlak thu a hril a,
Mi rilo chun thu lepchie a hril hlak.