Varna inpakna
8
1 Varnan tlâng a’n sam naw maw?Hrietna a khêk suok naw maw?
2 Lam sìr kho tlanga hai le
Lam thruoma hai a ngîr a,
3 Khawpui kotsuo bula hai,
A lutna kotpuia hai chun,
Inring takin a khêk suok a:
4 “Aw nangni mihriemhai hi,
Ka ko khêk cheu a ni hi;
In hriet dinga ka hril a nih.
5 Mimawlhai, fimkhur inchûk ro,
Invêthai, hrietthiemna nei ro.
6 Thil thra hril ding cheu ka nei,
Thu dik hril din bău ka phong.
Chuleiin lo ngaithla ro.
7 Ka băuin thu dik a hril a,
Ka hmŭrin rîtlona a ten.
8 Ka kam suok thu a’n dik a,
Thu kawi le lûtlè a um nawh.
9 A hre thiemtu ta dingin,
Thu indik vong a ni a,
Hrietna neitu ta dingin,
Soisel boa fie a nih.
10 Tangkaruohai nêk daiin,
Ka zirtirna hi thlang lem unla,
Rangkachak ditum tak nêkin,
Hrietna chu thlang lem hlak ro.
11 Lunghlu nêkin varna a hlu lem a,
Duthusam ieng khomin a tluk zo nawh.
12 “Kei, varna hin fimkhur ka thiem a,
Hrietna le rem hrietna ka kol sa bok.
13 LALPA tri dan chu suol theida a nih.
Uongthuong le chapo ka theida,
Nun suol le trong chaltlai khom.
14 Remruot thiemna, rorêl thiemna,
Hrietna le thilthawtheina ka nei.
15 Keima hmangin lalhan ro an rêl a,
Rorêltuhan dan indik an siem a;
16 Keima hmangin Rênghan ro an rêl a,
Hnuoia rorêltu milŭnhai khomin.
17 Mi ngainatu chu ka ngaina a,
Mi zongtu chun an mi hmu hlak.
18 Hausakna le inzaumna ka nei,
Hlawtlingna le hmûingîlna tlo chu.
19 Ka ra suok in dong ding chu,
Rangkachak hlîr nêkin a hlu lem,
Tangkaruo thra tak nêk khomin.
20 Felna lampui hrăwtu ka na,
Rorêlna indik lamtluong ngei chu.
21 Mi ngainatu chu ka sukhausa a,
An robawmhai ka sung sip hnŭr hlak.
22 “LALPA thil nei hmasa tak ka nih,
Tiena tlânga a thilsiemhai hma khan.
23 Chatuona inthoka indin ka nih,
Leilung insieng hmâ daih tah khan.
24 Tuifinriet um hmain ka pieng a,
Tui hnàrhai an hung pŭt hmâ daih,
25 Tlânghai an ngîr suok hma le,
Muolhai indin an ni hma khan;
26 Leilung le ramhai pieng hma,
Pilvuthai pieng hma daih khan;
27 Van a siem lai ka um ta a,
Tuifinriet le an ramri dinga
Kawlkawdong a khang lai khan;
28 Vàn sângah sûm a zar lai le
Li thrut a rem nghet lai khan;
29 A ruot chin bàk chîm lo dinga,
Tuipui ramri chin khangpek a,
Hnuoi del chin ding a thrè lai khan.
30 Chu lai chun themthiem angin,
Ama bulah ka um zing a,
Ama kuoma ka chêng leiin,
Ni tin hlimnain ka sip hlak.
31 A khawvel siem ka hlimpui a,
Hringmihai hi a nih ka lawm.
32 “Ka nauhai, tuhin ka thu ngai ro,
Ka thu zawmtu chu an hamthra.
33 Ka zirtirna hi ngaithla un la,
Var pha unla, ngâithă naw ro.
34 Ka kotkharah mi nghak ni tina,
Ka kotkhar bulah cheng zing a,
Ka thu ngaithlatu chu a hamthra.
35 Mi hmutu chun hringna an nei a,
LALPA ditsak an hlaw ngei bok.
36 Keima mi hêltuhai ruok chun,
Mani le mani an insuksiet a,
Kei mi theidatuhai khomin,
Thǐna an ngaizawng a nih.”