7
1 Ka naupa, ka thuhai hi vong la, Ka thupêkhai khawl khawm rawh.
2 Ka thupekhai zawm la, hring i tih.
I mit naulêng ang hielin,
Ka zirtirna hi humhal tlat rawh.
3 I kutpâra hai zem tlat la,
I lungril phêkah ziek rawh.
4 Varna chu “Ka farnu i nih” ti la,
Hrietthiemna chu laibungah nei rawh.
5 Uirenu lakah hum a ti che a,
Lawithlêmnu lakah vêng a ti che.
Nuhmei suol
6 Ka tukver zawngdaikal awngah
Tuol tieng saw ka hei thlir a,
7 Mi mawl ruol lai tlangval pakhat,
Lungvar tlasam hi ka hmu a.
8 Chu nu chèngna kotthlêr chu,
Hrawin a in tieng chu a pan a;
9 Unau hmel hai lai hi a na,
Thimin a hung nang mĕk a.
10 Nawchizor thuoma inchei,
Lungril vervêk tak put mi,
Nuhmeiin a’n tuokpui a.
11 Nu zakmaw huoisâr a na,
Inah a’n khum ngai naw a,
12 Kotthlêr le tuolzawla dam,
Kil tinah mi a’n chàn hlak.
13 Tlangval chu kuoin a fâwp a,
Hmai intìmna hrim nei loin,
Tlangnêl takin a kuomah,
14 “Voisun remna thilhlân ka’n hlân a,
Ka thu tiem khom ka hlen tah.
15 Chuleiin, nang hmu ding che’n,
Ka hung a, ka zong che a,
Ka hmu ta che a ni hi!
16 Aigupta patzaia khawng,
Khumpha mawi tak ka pha a,
17 Beraw, aloi, thingzungthak,
Rimtuiin khum ka chûl a;
18 Hung rawh, zankhuon hmangaina
Tuitling dawnin phâm ei tih.
19 Ka pasal a um naw a,
Hla taka inzin a nih.
20 Tangka ip sip a chawi a,
Thla lir hma chu hung naw nih.”
21 A kam thlumin a lêm hne a,
A kam nâlin a zăwl thlŭk a.
22 Chuongchun a zui ta nghal a:
That ding bawngchal an kei angin,
Sakhiin châng a sir chim a,
23 Thalin a lung a dawt tlang a,
Vaten a thipui ding hre dêr loa
Châng a baw ang el hi a nih.
24 Tu hin ngai ro, ka nauhai,
Ka thu suok hi bengkhon ro.
25 Nuhmei tieng chun ngha naw ro,
A lampui tieng invak lut naw ro.
26 Mi tam tak a’n hliem tah a,
Sukhlum khom a hau ta hle.
27 A in chu Seol lampui a na,
Chu chun thǐna pindan a sun.