Fimkhur ngaina dang
Thu intiemkam
6
1 I tuolbawm aia tuor intiem a,Hmêlhriet lo leibat rulpek dinga,
Dakhamah i lo insiem a ni chun,
2 I bâu ngeiin inhril âwk a,
I bau thu suokin a khit che chun,
3 I tuolbawm kuta i’n awk hrein,
I hung intàl suok theina dingin,
Ka naupa, hieng hin thaw rawh:
Fe la, a kuomah inphàhnuoi la,
I thu i sŭt phalpêk ngei dingin,
I tuolbawm chu thlût ngat ngat rawh.
4 I mit insîmsan naw la,
I mit vun insîntir naw rawh.
5 Sakhi chânga âwk a tlan suok ang le,
Vate âwk a vuong suok angin,
Nang khom intâl suok ngei rawh.
Thabona
6 Nang thabo, phaivang kuomah fe la,
An um danhai ngaituo la, var rawh.
7 Inrawitu, thruoitu le lal an nei nawh.
8 Nipuiah fak ding mamaw an zong a,
Busîk hunah bu an sek khawm hlak.
9 Mi thabo, ieng chen am i zâl ding?
I zâl chu ieng tik am i tho ding?
10 ‘La hang zăl met ka tih,
La hang inhnâr net ka tih,
Kut hmasuiin, hàdam takin,
La’n zam met ka tih’ i ti sung khan,
11 Pasietna chun rûkru angin,
Hung nang thut a ti che a,
Tlaksamna khomin râl angin,
Hung nangchîng thut a ti che.
12 Mi hmangna bo le khawlo chun,
Thu vuongva a’n virpui a,
13 A mitin mi a siei khum a,
A kein mi a zaizir a.
A kut chalin a khîk kuol a.
14 A lungril a lûtinle a,
Suol thaw ding ringot a phan a,
Innghirnghona a chok suok hlak.
15 Sietnain hung nang thut a ta,
Siem thrat ruol lo sietnain,
Thawk le khatah nang rup a tih.
16 Thil paruk LALPAN a theida a,
Thil pasari a ten èm ém bok:
17 Mit chapohai, khêl hril hmanghai,
Poi tawk lo mi that chînghai,
18 Thil suol phierruk hlak mihai,
Suol thaw dinga ngal hrâthai,
19 Hrepuitu der, khel hril chǐng mi,
Unau innghirnghotirtuhai.
Uire lo dinga infŭina
20 Ka naupa, i pa thupekhai zawm la,
I nu zirtirna che nghatsan naw rawh.
21 I lungrilah vong kumkhuo la,
I rîngah zem tlat hlak rawh.
22 I kalchawinaah thruoi a ti che a,
I in chàngin vêng a ti che a,
I har pha leh inbiekpui a ti che.
23 Hieng thupêkhai hi khawnvar a na,
Hi inzirtirna hi var a nih.
Inthunun dinga inzilna hi,
Hringna lampui a nih.
24 Nuhmei khawlohai lakah,
Vêng him a ti che,
Nu suol kam thlum laka chun.
25 A pangti mawina inhnar naw la,
A mitin kuoi thlu naw raw se che.
26 Nawchizor chu bei tlanga inchawk thei a na,
Uirenu ruok chun i hringna a pêl a nih.
27 Tu’n am puon kàng loin mal chungah,
Meiling a sêk khawm thei a?
28 Kepha kàng si loin meiling chungah,
Mi a lawn thei hlak am a ni?
29 Mi nuhmeihai suolpuitu chu,
Chuong ang char chu a ni a,
Hrem loin suok ngai naw nih.
30 Trăm leia thil inrutu chun,
Endong a hlaw ngai naw a,
31 Sienkhom man suok a ni chun,
A lêt sariin rul a tih,
A nei po hŭ khom lo ni sien.
32 Mi nuhmei uirepuitu chu,
Hrietna tlasam mi a na,
A thawtu chun ama a’n suksiet hlak.
33 Hliem le hming siet tuor a ta,
Dam sungin muolpho a ta;
34 Thiknan a pasal lung sukling a ta,
Phuba a làk pha zà ngai naw nih.
35 Suma intlâk nuom naw ni a,
Ieng zât pekin lungawi naw nih.