Uire laka fimkhur ding
5
1 Ka naupa, ka varna thu hi ngaiven la,Thu ril ka hrilhai hi bengkhon rawh,
2 Fimkhur thiem theina chu vong a,
I hmûrin hrietna a vongna dingin.
3 Uire nu hmŭrah khuoizu a far a,
Sahriek nĕkin a dang a’n nàl lem.
4 Sienkhom, a tawp tieng ruok chu,
Sairam khâkin a trong a kha a,
Kawlhnâm ngeituo angin a ngei.
5 Thìna tieng panin kè a pên a,
A lampui chun Seol a sun.
6 Hringna lam hraw uksak loin,
Lampui kikawi a hraw lem a,
A hraw ti khom a hriet si nawh.
7 Chuong chun tu hin ka naupahai,
Ka hril chêu hi ngaithla unla,
Ka hril chêu hi pètsan naw ro.
8 A kawl hnaiah fe naw unla,
A tuol kot khom va hnai naw ro.
9 In hratna tak mi danghai pein,
Nunrawng kutah thi pal rawi in ta,
10 Mi dang daiin in hausakna tlânin,
Hnam dang ta din inrim rawi in tih.
11 In taksa le thá zûr hnungah,
In thi tawm ruoiin inrûm in ta,
12 “Thununna ngai thei lo a,
Zilna ka lo hnawl el kha aw!
13 Mi zirtirtuhai thu zawm lo a,
An zirtirna ka ngaithlak naw leiin,
14 Vantlang pungkhawmhai hmaah,
Ka muolpho let trĕp chu an ta hih”
An la ti ngei ding a ni si a.
15 I tuibêla tui ngei chu tlàn rawh,
I tuikula tui tharlâm ngei chu.
16 I tuihnăr chu kotthlerah pût darin,
Tuolah a luong dar ding maw?
17 I tui chu i tlân ding chauh a na,
Mi dang leh intrawm naw ro.
18 I tuikhur chu malsawmin um sien,
I vanglai nu-thâia chun hlim rawh.
19 Zukpui sen anga ditum,
Zuk latuoi anga nal chun,
A trângah inbei tlaitir sien che,
A hmangainan hîp tăng che raw se.
20 Ieng leiin am nang ka naupa,
Uirenu zŭnah intângin,
Lawithlemnu tràngah i’n bei ding?
21 Mihriem khawsak dan po po hi,
LALPA chun a hmu fai vong a,
A lampuihai a enthlithlai hlak.
22 Mi rilo chu a suol thawin a khit a,
A suolna hruolin a vêt tâng hlak.
23 Thununna tlasamin thîng an ta,
An invèt bilingnan fen hmang a tih.