Varna hlawkzie
4
1 Ka nauhai, in pa zirtirna hi ngaithla unla,Hre thiem dingin ngaiven thra ro.
2 Inchuktirna thra ka pêk cheu hi,
Ka zirtirna nghatsan naw ro.
3 Ka pa nau mal chawi ka ni a,
Ka dawng laia ka nu duot ka na,
4 Ka pain hieng hin a mi’n chuktir a:
“Lungrilin ka thuhai hi vong zing la,
Ka thupêkhai zawm la, dampui i tih.
5 Varna nei la, hrietthiemna nei rawh;
Ka thuhai theinghil naw la,
Pĕtsan ngai hrim hrim naw rawh.
6 Varna nghatsan ngai naw la,
Humhim a ti che a;
Ngaina rop hlak la,
Vêng zing a ti che.
7 Varna nei hi a poimaw tak a,
Chuleiin varna nei rawh;
Thil dang ieng po nèk khomin,
Hrietthiemna lungvar thlang rawh.
8 Ngaihlu la, chawisang a ti che,
Pom la, chawimawi a ti che.
9 Tonlairang intontir a ti che a,
Lallukhum ropui inkhumtir a ti che.
10 Ka naupa, ka thu ngaithla la,
Ka thu hril che hi pom tlat la,
Dam sawt phana’n hmang i tih.
11 Varna lampui ka kawkhmu che a,
Lam ngìlah ka thruoi che hi.
12 I pheikhai sukzâng a ta,
Tlân rak la khom tlu naw ti nih.
13 Ka zirtirna chel tlat la,
Inthlàdà ngai dĕr naw rawh;
Vong tlat rawh, i hringna a nih.
14 Mi rilohai lampui sir naw la,
Mi suolhai lampui hraw naw rawh.
15 Pumpel la, hraw naw rawh,
Nghatsan la, i lam hrawah fe rawh.
16 Suol thaw loin an in thei naw a,
Mi an sukthlŭk hmâ khat chu,
An imû hrim a suok thei nawh.
17 Rîtlona chu an bu ring a na,
Nunrawngna chu an uoiin a nih.
18 Mi felhai lampui ruok chu,
Zîng ni zung ang hi a na,
A hung êng zuol deu deu hlak,
Sŭn khawvar an chang chenin.
19 Mi suolhai lampui ruok chu,
Thim să tak ang hi a na,
An insui san khom an hriet nawh.
20 Ka naupa, ka hril che hi poisa la,
Ka thuhai hi ngaithla kar rawh.
21 I hmu phàk loah inthlà naw la,
I lungrilah vong tlat hlak rawh.
22 A neitu ta dingin hringna a na,
Taksa ta dingin hriselna a nih.
23 Thil dang po po nêk khomin,
I lungril vêng fimkhur rawh,
Hringna hnâr a ni si a.
24 Trong chaltlai hmang ngai naw la,
Thu porche hril bănsan rawh.
25 Hma tieng tlûn takin en la,
I hma zawn bi ngar ngar rawh.
26 I lampui ding en ngun la,
I kalchawi khom tluong a tih.
27 Voi tieng chang tieng pêt naw la,
Suol lakah i ke vêng thra rawh.