Varna rä danghai
3
1 Ka naupa, ka zirtirna hi theinghil naw la,Ka thupekhai hi lungrilah vong tlat rawh.
2 Chuongchun sawt tak dam i ta,
Vangneina vûrin um i tih.
3 Hmangaina le ringumnahai,
Inthlà ngai hrim hrim naw la,
I rîngah hlì zing hlak la,
I lungril phêkah ziek rawh.
4 Pathien le mihriem lakah,
Ditsak le hming thra hlawng i tih.
5 I lungril po poin LALPA ring la,
I hrietnaah innghat naw rawh.
6 I thilthaw taphotah ama hre la,
I lampui suktluongpek a ti che.
7 Mani var inti ngai naw la,
LALPA trì la, suol maksan rawh.
8 I taksa’n hrisel pha’ng a ta,
I rŭ le châng sukhrât a tih.
9 I thil neiin LALPA chawimawi la,
I tharsuok hmasa tak po po khomin;
10 I bu in hung sung sip a ta,
I dawnbel uoiin tharin liem a tih.
11 LALPA thununna che chu,
Ka naupa, ngainêp ngai naw la,
A zilhalna che chu theida naw rawh.
12 Pain a nau dit a thunun angin,
LALPAN a hmangaihai a thunun hlak.
13 Varna hmutu chu a hamthra,
Hrietthiemna chang phaktu khom.
14 Tangkaruo le rangkachaka,
Sumdawng nêkin a hlawk lem daih.
15 Lunghlu rubi nêkin a hlu lem a,
Dusàm ieng khomin a el zo nawh.
16 A chang tieng dam sawtna a kol a,
A voi tieng hausakna le ropuina.
17 A lampuihai chu a hlimum a,
Thlamuongna lampui vong a nih.
18 A cheltu din hringna thing a na,
A pomtu taphot hamthrang an tih.
19 LALPA chun varna hmangin,
Leihnuoi bulthrut a phŭm a,
Hrietna hmangin vanvêl a’n din.
20 A hrietnan lipuihai sukthre-in,
Sûm hmangin daidaw a’n tlăktir.
21 Thil bûk le fimkhur thiemna,
Ka naupa vong tlat hlak la,
I hmu phak loah inthlà naw rawh.
22 I nun sukhringtu ni’ng a ta,
I rîng cheimawitu ni bok a tih.
23 Nghet takin kal chawi i ta,
I sir inphet ngai naw nih.
24 Tri loin zâl hmun rem i ta,
Imu inhnik takin in i tih.
25 Mi suol siet tuok thut angin,
Tuok ve thut inlau naw rawh.
26 I’n nghatna LALPA a ni leiin,
I kè chânga ăwk phal naw nih.
27 I kuta i thaw thei a ni chun,
Mi chan ding thil thra hrim hrim,
An lakah hrênpêk naw rawh.
28 I kuta thaw thei zing si,
“Zingah hung la, pêng ka ti che”
I tuolbawm kuomah ti naw rawh.
29 Ngaingam taka i bula khawsa,
I tuolbawm sietna ding phan naw rawh.
30 I poi ieng khom tawk lohai chu,
A san boin hêk ngai naw rawh.
31 Mi nunrawng inhnar naw la,
A lampui hraw ngai naw rawh.
32 LALPAN mi lûtinle a theida a,
Mi ngîlhai ruok chu a ringzo.
33 Mi rilohai suongkuo chungah,
LALPA trongsie a fu hlak a,
Mi fel in ruok chu mal a sawm hlak.
34 Mi chapohai chu a nuisaw a,
Inngaitlawmhai chu zangaina a pêk.
35 Mi varin chawimawi a hlaw a,
Mi invêtin muolphona chang a tih.