Varna rä
2
1 Ka naupa, ka thuhai hi pom la,Ka thupêkhai khâwl khăwm rawh.
2 Varna tieng i na dăw la,
Hre thiem di’n i lungril thle rawh.
3 Thu ril hriet thei dàn zong la,
Hriet thiem theina hni hlak rawh.
4 Tangkaruo anga zong a,
Ro phŭm rûk anga i dap chun,
5 LALPA tri nachang hre-in,
Pathien hrietna hung nei i tih.
6 Varna petu chu LALPA a na,
Hrietna le hmu fûk theina chu,
A baua inthoka suok a nih.
7 Mi ngîl ta din hlawtlingna indik,
A lo sêkkhawlpek hlak a,
Indik taka kalchawitu ta di’n,
Ama chu an phaw a nih.
8 Mi indikhai kalchawi a vèngpèk a,
Ama ringtuhai lampui a hum hlak.
9 Chuongchun, thil fel, indik le inlai,
Lam thra tinrêng hung hrieng i tih.
10 Varna chu i lungrilah lût a ta,
Hrietna chu i hringnan hlimpui a ta;
11 Fimkhur thiemnan enkai a che a,
Hrietthiemna chun vêng a ti che.
12 Mi rilohai lampuia inthok le
Thu teplo hril hmanghaia inthokin,
Varna chun san suok a ti che.
13 Anni chun lam ngìl pètsanin,
Lampui inthimah an lŭt a;
14 Thil suol thaw an hlimpui a,
Suol hĕm kăwia um an lawm.
15 An lampuihai a kîkăwi a,
Suol tieng ăwn tlat mi an nih.
16 Kam thluma lawithlèmtu che,
Nuhmei suol lakah vêng a ti che,
17 Ama chun Pathien hmaa,
A thu intiem chu ngainêpin,
A tleirawl lai koppui a lĕrsan.
18 A in tieng pan chu thina a na,
Chu lampui chun mithi khuo a sun.
19 A in pantuhai a tu el khom,
An hung kìr nawk ta ngai naw a,
Hringna lam an paw ta ngai nawh.
20 Mi thrahai lampui chu hraw la,
Mi felhai lampuiah kal chawi rawh.
21 Mi ngîlhan ram hi hluong an ta,
Mi felhai chu chêng zing an tih.
22 Mi rilo chu sât thlan’g an ta,
Phatsantu chu phâwi hmang an tih.