THUVARHAI
Thuhma le Thupui
1
1 Israel lal Davida naupa Solomon thuvarhai chu:2 Varna le inchûktirna thra dong theina ding le thu inril hriet thiem theina ding dăm,
3 Var taka khawsak dàn dăm, indik tak le thlei bik nei loa rorel thiem theina ding dăm,
4 Mi mawlhai sukvar a, hrietna le fimkhur taka remruot thiemna thralaihai pe ding dăm,
5 Mi varhan ngaithla a, an hrietna an sukpungna ding dăm, hrietthiemna nei mihaiin thruoitua an hmang theina ding dăm,
6 Thuvar hai, tekhinthu hai, mi varhai thu le hla khirh hai an hriet thiem theina ding dămin.
7 LALPA tri hi hrietna bul a nih,
Mi invêthai ruok chun varna le inchûktirna chu an hmusit hlak.
Varna chel tlat dinga infŭina
8 Ka naupa, i pa zirtirnahai che hi ngaithla la,
I nu inchuktirna khom nghatsan naw rawh.
9 I lû cheimawitu tonlairang ni’ng a ta,
I rîng măwitu thrî ni bok a tih.
10 Ka naupa, mi suolhai zăwr thlŭk theiin um naw rawh.
11 “Hung rawh, thisen insuo dingin,
Anni chu inchăn rûk ei ta,
Poi tawk lohai chu lambun ei ta,
12 Thlàn ang elin anni rawi chu,
A hring pumin dol vong ei tih,
Khuorkhurûma tlahai ang elin;
13 Ro hlu tam tak hmûng ei ta,
Ei thil rokin ei inhai sungsip ei tiu;
14 Keini tieng hin hung thrang la,
Poisa bawm intrâwm ei tiu”
Tia an zăwr ché khomin,
15 Ka naupa, anni lai thrang ve naw la,
An lampui hraw ve naw rawh.
16 Thil suol hnotin an tlàn hrăt a,
Thisen insuo di’n an kut a truonrang.
17 Vatehai mi hmu lai zing a,
Lèn châng kam chu a hlawk nawh.
18 Chuong mihaiin an inchăn chu,
Anni thisen bok a na,
Mani inlambun an nih.
19 Hlawkna indik naw hnottuhai chu,
Chuong ang chu an tawpna a nih,
A neituhai hringna ngei a lakpĕk hlak.
Varna hnawl trǐumzie
20 Kotthlêr le tuolzawla hai,
Varna chun tlâng a’n sam a;
21 Kotthlêr lŭn lai a khêk suok a,
Khawpui kotsuoah thu a hril:
22 “Mi mawlhai, ieng chen top am,
In la mawl zui pei ding a na?
Nangni varna deusawtuhai,
Ieng chen am in la deusaw ding?
23 Ka zilna cheu ngaithla unla chu,
Ka lungril nangni tieng inhongin,
Ka thu ka hril ding cheu a ni bah!
24 Kuta hûiin ka ko cheu a,
In mi ŭksak nuom si nawh.
25 Ka thurawn la nuom lo a,
Ka zilna in pom naw leiin,
26 Siet in tuok pha innui ka ta,
Vangduoinan a tlakbuok phá cheu,
Ka nuisaw ve ding cheu a nih:
27 Thlipui anga a nuoi pha cheu,
Thrawngaleivir anga a làk pha cheu,
Lungngai buoinan a chîm pha cheu,
28 “Mi ko in ta, don naw ning cheu;
Mi zong in ta, mi hmu naw ti niu.
29 Hrietna chu in theida a,
LALPA in tri nuom naw a,
30 Ka thurawnhai pom nuom lo a,
Ka zilnahai in hmusit leiin,
31 In nun rà chu fa ta’ng in ta,
In remhrietin insukkhop in tih.
32 Mi mawlha’n an mawl invaina,
An la thipui ding a na,
Invêthan an ngai sukngamna,
An la sietpui bok ding a nih.
33 Ka thu ngaitu chu him a ta,
Sietna hrim hrim tri ve loin,
Lungmuongin khawsa’ng a tih.