Inpakna hla
Davida inpakna hla
145
1 Chawimawi ka che, ka Lal Pathien,Kumkhuon i hming inpâk ka tih.
2 Ni tinin inpâk ka ti che,
Kumkhuon i hming chawimawi ka tih.
3 LALPA chu a ropui ĕm a,
Inpâk chungchuong ding hrim a nih,
A ropuizie sui phâk an nawh.
4 Thrang tinin i thilthawhai chu,
Ruoltharhai hril sawng pei an ta,
I thaw ropuizie puong an tih.
5 I mawi ropuizie hril an ta,
Kei khom i thilthaw makziehai,
Sûtin dawnkhawl ve hlak ka tih.
6 I thaw ropui le râpumzie,
Mihaiin puong dar tawl an ta,
I ropuizie hril vêng ka tih.
7 Thratna i hauzie chu lawmin,
Hlim takin tlâng làmpui an ta,
I’n dikzie hi khĕkpui an tih.
8 LALPA chu hmâi tlâi tak el,
Mi ngilnei le lung in-uoi tak,
Hmangai tawp loa sip a nih.
9 Mi tin chungah LALPA a thra,
A thilsiem po po hai khom hi,
An rêngin a lunginsiet vong.
10 Aw LALPA i thilsiemhaiin,
Lawmin inpâk an ti che a,
I mi thienghlim po po khomin,
Inpâkin chawimawi an ti che!
11 I lalram ropuizie hrilin,
I thilthawtheizie puong an tih.
12 I thilthaw ropuiziehai chu,
Mihai kuomah puong dar an ta,
I ram ropuizie hril an tih.
13 I ram chu kumhlun ram a na,
I lalram khomin suon tin a daih.
A thutiemah LALPA a ringum,
A thilsiem chungah ngil a nei.
14 Tluhai chu LALPAN a tungding,
Indom kŭnhai chu a kei har.
15 Nangma thlîrtuhai po po chu,
A hun takah fak ding i pêk.
16 I kut phara i hang hrăi chun,
Hring tinrênghai an tlai seng hlak.
17 Kong iengkimah LALPA a’n dik,
A thaw taphotah ngil a nei.
18 Ama kotu taphot kuomah,
LALPA chu a hnâi zing hlak a,
Titakzeta kotu kuomah.
19 Ama trituhai ditzawng chu,
A sukhlawtlingpêk ngei hlak a,
An rawl hrein a san him hlak.
20 Ama hmangaituhai po chu,
LALPAN a vĕng him zing hlak a,
Sienkhom mi rilohai ruok chu,
Aman sukbohmang vong a tih.
21 LALPA inpăkna thuhai chu,
Ka băuin puong suok hlak a ta,
Thilsiem tinin a hming thienghlim,
Kumkhuoin inpâk raw hai se.