Sandamtu Pathien inpakna
146
1 Haleluia,Aw ka thlarau, LALPA chu inpâk rawh.
2 Ka dam sung po LALPA inpâk ka ta,
Ka Pathien chawimawiin hla sak ka tih.
3 Lalhai chungah ringna innghat naw rawh,
Hringmihaiin an sandam thei naw che.
4 An thuok a tawp, pilah an kir nawk a;
Chu phä an tum iengma lo a chang hlak.
5 Jakob Pathien, thrangpuitua nei a,
LALPA a Pathien chunga beiseina,
Innghat hlaktu chu mi hamthra a nih.
6 Ama chun hnuoi le vànhai a siem a,
Tuifinriet le a sûnga umhai leh.
A thu chu kumkhawtluongin a vong hlak.
7 Nêksawrhai thu fel taka rêlpekin,
Phingtrâmhai kuomah fak ding a pêk hlak.
LALPAN mi tânghai po po chu a’n suo.
8 LALPAN mitdelhai mit a sukvarpek.
LALPAN lungngaia kûnhai a kei har.
LALPAN mi indikhai chu a hmangai.
9 LALPAN mikhuolhai chu a vèng hlak a,
Fahra le hmeithai hai a somdawl a,
Mi suolhai lampui ruok chu a khârpek.
10 LALPA chu kumkhuoin inlal a tih,
Aw Zion, suon tina i Pathien chu.
Haleluia.